८० लाख घुस लिएको आरोपमा लुम्बिनी विकास कोषका पूर्वयोजना प्रमुख भट्टराई दोषी ठहर

२५ जेठ, रुपन्देही । विशेष अदालतले लुम्बिनी विकास कोषका पूर्व योजना प्रमुख इन्जिनियर सरोज भट्टराईलाई भ्रष्टाचार मुद्दामा दोषी ठहर गरेको छ । अख्तियार दुरुपयोग अनुसन्धान आयोगले भट्टराई विरुद्ध गत चैत २५ गते विशेष अदालतमा मुद्दा दायर गरेको थियो । 

विशेष अदालतका अध्यक्ष टेकनारायण कुँवर, सदस्यद्वय तेजनारायण सिंह राई र रीतेन्द्र थापाले भट्टराईलाई भ्रष्टाचार मुद्दामा दोषी ठहर गर्दै अकुत सम्पत्ति आर्जन गरेको जनाएको छ । पछिल्लो पटक कोषको उपाध्यक्षमा ल्याहरकल लामा आएपछि उनलाई हटाएर स्मिता भट्टलाई सो जिम्मेवारी दिइएको थियो । 

भट्टराईले पदीय दुरुपयोग गरी कोषका ठेकेदारबाट ८० लाख रुपैयाँ घुस खाएको अख्तियारले दावी गरेको थियो । भट्टराईले आमा जनक नन्दनी भट्टराईको नाममा भक्तपुरको गुण्डु गाविस–३ स्थित २ रोपनी ९ आना २ पैसा क्षेत्रफल भएको कित्ता नम्बर १३७४ र २ आना १ पैसा क्षेत्रफल भएको अर्को कित्ता नम्बर १३७५ को जग्गामा लगानी गरेको अख्तियारको दावी थियो । 

भट्टराईले सो जग्गा खरिद गर्नका लागि लुम्बिनी विकास कोषमा ठेक्काको काम गर्ने निर्माण कम्पनीका सञ्चालकसँग घुस लिएर त्यो जग्गा किनेको अख्तियारको दावीलाई अदालत सदर गरेको छ । सजायका लागि जेठ ३१ गते पेसी तोकिएको छ ।