नामिबियालाई ५ विकेटले पराजित गर्दै स्कटल्याण्ड विजयी

२५ जेठ, अमेरिका । जारी आइसीसी टी-२० विश्वकपमा स्कटल्यान्डले नामिबियालाई पराजित गरेको छ । गएराति सम्पन्न समूह बि अन्तर्गतको यस खेलमा स्कटल्यान्डले नामिबियालाई ५ विकेटले पराजित गरेको हो ।

नामिबियाले दिएको १५६ रनको लक्ष्य पछाएको स्कटल्यान्डले १८.३ ओभरमा ५ विकेट गुमाउँदै लक्ष्य पुरा गरेको थियो । यस अघि पहिला ब्याटिङ गर्दै नामिबियाले २० ओभरमा ९ विकेट गुमाएर १५५ रन बनाएको थियो । यो जितपछि स्कटल्याण्डको २ खेलमा ३ अंक भएको छ ।

पहिलो खेलमा इङल्याण्डविरुद्धको खेल वर्षाले रद्द भएपछि एक अंक पाएको स्कटल्याण्ड समूह बि मा २ खेलमा ३ अंक सहित शीर्ष स्थानमा उक्लिएको छ । त्यस्तै पहिलो खेलमा ओमानलाई हराएको नामिबियाको यो हारपछि २ खेलमा २ अंक भएको छ । अब स्कटल्यान्डले अर्को खेल जुन ९ मा ओमानविरुद्ध खेल्ने छ भने त्यस्तै नामिबियाले जुन १२ मा अस्ट्रेलियाविरुद्ध खेल्ने छ ।