विश्वकपमा आयरल्यान्डमाथि क्यानडाको ऐतिहासिक जित

२६ जेठ, अमेरिका। क्यानडाले जारी आईसीसी टी–२० विश्वकपमा पहिलो जित हासिल गरेको छ । पहिलो पटक विश्वकप खेलिरहेको क्यानडाले गएराति सम्पन्न खेलमा टेस्ट खेल्ने देश आयरल्यान्डलाई १२ रनले पराजित गरेको हो । क्यानडाले दिएको १३८ रनको लक्ष्य पछाएको आयरल्यान्डले २० ओभरमा ७ विकेट गुमाएर १२५ रन मात्र बनाएपछि खेल क्यानडाले १२ रनले जितेको हो । यसअघि क्यानडाले पहिला ब्याटिङ गर्दै ७ विकेट गुमाएर १३७ रन बनाएको थियो ।

समूह 'ए' मा यो जितपछि क्यानडाले २ अंक हासिल गरेको छ । पहिलो खेलमा  अमेरिकासँग हार बेहोरेको क्यानडाले दोस्रो खेलमा जित हासिल गरेको हो । त्यस्तै आयरल्यान्डले भने लगातार दोस्रो हार बेहोरेको छ । आयरल्याण्डले पहिलो खेल भारतसँग हारेको थियो । अब क्यानडाले अर्को खेल जुन ११ मा पाकिस्तानविरुद्ध खेल्ने तालिका रहेको छ भने आयरल्याण्डले भने जुन १४ मा अमेरिकासँग खेल्ने तालिका रहेको छ ।