राजदूत फिर्ता बोलाउने निर्णयले प्रधानमन्त्रीको कूटनीतिक हैसियत समाप्त भयोः कोइराला

२६ जेठ, काठमाडौं । नेपाली कांग्रेसका वरिष्ठ नेता डा. शेखर कोइरालाले सरकारको राजदूत फिर्ता बोलाउने निर्णय अत्यन्तै अदूरदर्शी भएको बताएका छन् । उनले यो निर्णयबाट प्रधानमन्त्री पुष्पकमल दाहाल प्रचण्डले नेपालको कूटनीतिक हैसियतलाई समाप्त पारेको टिप्पणी गरेका छन् । 

शनिबार सामाजिक सञ्जाल फेसबुकमा आफ्नो छोटो विचार राख्दै कोइरालाले असान्दर्भिक समयमा राजदूत फिर्ता बोलाउने निर्णय गरिएको भन्दै यस्तो अवस्थामा प्रधानमन्त्री प्रचण्ड भारतीय प्रधानमन्त्री नरेन्द्र मोदीको शपथग्रहण समारोहमा कुन मुख लिएर उपस्थित हुने भन्दै प्रश्न गरेका छन् । 

कोइरालाले सरकारको विभिन्न ११ देशका राजदूत फिर्ता बोलाउने निर्णयको औचित्यमाथि प्रश्न उठाएर उक्त निर्णय संयोग नभई नियतबस भएको र नेपालको कुटनीतिलाई कमजोर सावित गरेको बताएका छन् । उनले लामो घनिष्ठ सम्बन्ध भएको, व्यापारको झण्डै दुईतिहाई हिस्सा ओगटेको र आर्थिक, सामाजिक तथा धार्मिक सम्बन्धमा अगाडि भएको भारतबाट राजदूत फिर्ता गरेर फेरी त्यही देशको भ्रमणमा निस्कनु लज्जास्पद भएको बताएका छन् । 

त्यो देशमा भएको राजदूतलाई असक्षम भनेर फिर्ता बोलाउने र त्यही देशको नवनिर्वाचित सरकारको शपथग्रहणमा प्रधानमन्त्री जाने कुरा कुनै पनि हिसाबले सकारात्मक नभएको कोइरालाको भनाइ छ । दूरगामी महत्वका यस्ता विषयमा प्रधानमन्त्री प्रचण्डले बालापन देखाएको र सरकारको हस्तक्षेपकारी यो निर्णय देशका लागि स्वीकार्य नभएको दाबी गरेका छन् ।