कोशी सरकार गठनविरुद्धको रिटको सुनुवाइ आजदेखि पूर्ण इजलासमा

२३ जेठ, काठमाडौं । कोशी प्रदेश सरकार गठन विरुद्धको रिट निवेदनमा आज सर्वोच्च अदालतको पूर्ण इजलासमा सुनुवाइ हुँदैछ । यसअघि जेठ २३ गते न्यायाधीशद्वय तिलप्रसाद श्रेष्ठ र बालकृष्ण ढकालको इजलासले उक्त विवादमा संवैधानिक व्याख्या जरुरी भएको ठहर गर्दै सुनुवाइका लागि पूर्ण इजलासमा पठाउने आदेश गरेको थियो ।

नेकपा (एमाले)का संसदीय दलका नेता हिक्मत कुमार कार्कीले प्रदेशसभाका बहुमत सदस्यको समर्थन जुटाएपछि गत २७ वैशाखमा मुख्यमन्त्री नियुक्त भएका थिए । प्रदेश प्रमुखको उक्त निर्णयविरुद्ध निवर्तमान मुख्यमन्त्री केदार कार्कीले सर्वोच्च अदालतमा रिट निवेदन दायर गरेका थिए । 

रिट निवेदनमा प्रदेश प्रमुखले गत वैशाख २६ गते सरकार गठनका लागि गरेको आह्वान बदर गर्न, गत वैशाख ७ गते प्रदेशसभाले पारित गरेको सङ्कल्प प्रस्ताव बदर र हिक्मत कार्कीलाई मुख्यमन्त्रीमा नियुक्ति बदर माग गरिएको थियो ।