बालुवाटार पुगेर ओलीले प्रधानमन्त्रीलाई भने शुभयात्रा !

२७ जेठ, काठमाडौं । भारत भ्रमणबाट फर्किएका बेला प्रधानमन्त्री प्रचण्डलाई राँगा (मुर्रा) चढेर आएको भन्दै खरो आलोचना गरेका एमाले अध्यक्ष केपी शर्मा ओलीले यस पटक भने भारत जान लागेका बेला बालुवाटारमै पुगेर प्रचण्डलाई शुभयात्राको शुभकामना दिएका छन् ।  
 
प्रधानमन्त्री प्रचण्डलाई शुभयात्रा भन्न उनी आइतबार बिहान पौन ११ बजे बालुवाटार पुगेका थिए । प्रधानमन्त्रीको सचिवालयका अनुसार, भेटमा समसामयिक राजनीतिक, बजेट, प्रदेश सरकार र मोदीसँग भेट भएको अवस्थामा के कुरा राख्ने  भन्नेबारे छलफल भएको थियो ।  

प्रधानमन्त्री प्रचण्ड आजै भारत प्रस्थान गर्दैछन् । भारतीय समकक्षी नरेन्द्र मोदीको शपथ ग्रहण समारोहमा सभागी हुन प्रचण्ड दिउँसो १ बजेर २५ मिनेटमा त्यसतर्फ प्रस्थान गर्ने कार्यक्रम छ । त्यसअघि ओलीले प्रचण्डसँग भेट गरेर छलफल गरेका हुन् ।