न्यायाधीश पोखरेल इजसालमा परेपछि हेर्न नमिल्नेमा पर्यो कोशी सरकार गठनविरुद्धको रिट

२७ जेठ, विराटनगर । सर्वोच्चका न्यायाधीश सुनिलकुमार पोखरले न्यायाधीश हुनु अगाडि कोशी प्रदेशको मुद्दामा बहस गरेका कारण आइतबार पूर्ण इजलासमा सुनुवाइका लागि पेशी चढेको कोशी सरकार गठनविरुद्धको रिट हेर्न नमिल्नेमा परेको छ ।

सर्वाेच्च अदालतले पूर्वमुख्यमन्त्री केदार कार्कीले दायर गरेको रिट सुनुवाइका लागि न्यायाधीशहरू प्रकाशकुमार ढुंगाना, अब्दुल अजीज मुसलमान र सुनिलकुमार पोखरेलको पूर्ण इजलास ताकिएको थियो । २७ वैशाखमा नै मुख्यमन्त्रीमा आफ्नो निरन्तरताको मागसहित केदार कार्कीले सर्वाेच्च अदालतमा रिट निवेदन दिएका थिए । 

न्यायाधीश पोखरेलले कानुन व्यवसायी हुँदा गत भदौमा कोशी प्रदेशका तत्कालीन मुख्यमन्त्री उद्धव थापाको नियुक्तिविरुद्ध वर्तमान मुख्यमन्त्री हिक्मतकुमार कार्कीले दायर गरेको रिटमा थापाको पक्षमा बहस गरेका थिए । त्यही कारण आज कार्कीको रिट हेर्न नमिल्नेमा परेको सर्वोच्च प्रशासनले जनाएको छ । 

२७ असोज २०८० मा संविधानको धारा १६८ को उपधारा ५ अनुसार मुख्यमन्त्री बनेका केदार कार्की अल्पमतमा परे पनि विश्वासको मत परीक्षण नगरेका कारण २६ वैशाखमा स्वतः पदमुक्त गर्दै प्रदेश प्रमुखले २७ वैशाखमा हिक्मतकुमार कार्कीलाई मुख्यमन्त्री नियुक्त गरेका थिए ।