असार दोस्रो साता मौद्रिक नीति ल्याउने तयारीमा रहेको राष्ट्र बैंकले माग्यो सुझाव

२९ जेठ, काठमाडौं । नेपाल राष्ट्र बैंकले आगामी आर्थिक वर्ष २०८१/८२ को मौद्रिक नीतिका लागि सुझाव माग गरेको छ । राष्ट्र बैंकको आर्थिक अनुसन्धान विभागले आइतबार एक सूचना जारी गर्दै सुझाव माग गरेको हो । आगामी १६ असारभित्र राष्ट्र बैंकको आर्थिक अनुसन्धान विभागमा सुझाव पठाइ सक्नु पर्ने छ ।
 
सरकारले आगामी आर्थिक वर्षको बजेत प्रस्तुत गरेसँगै राष्ट्र बैंक मौद्रिक नीति तर्जुमाका लागि अघि बढेको हो । राष्ट्र बैंकको व्यवस्थाअनुसार मौद्रिक नीति आर्थिक वर्ष सुरु भएको १५ दिनभित्र ल्याइसक्नुपर्ने छ । बैंकले मौद्रिक नीति तर्जुमा गर्ने प्रक्रिया अघि बढाएको हो ।

आगामी आर्थिक वर्षको बजेट तथा कार्यक्रम कार्यान्वयनमार्फत् सरकारले ६ प्रतिशतको आर्थिक वृद्धि हासिल गर्ने र मुद्रास्फीति ५.५ प्रतिशतमा सिमित राख्ने लक्ष्य राखेको छ । सोही उपलब्धि हासिल हुने र वित्त नीतिसँग तादात्म्यता कायम हुने गरी केन्द्रीय बैंकले मौद्रिक नीति तयार पार्न लागेको हो ।

आगामी आर्थिक वर्षको मौद्रिक नीति केन्द्रीय बैंकका गभर्नर महाप्रसाद अधिकारीको पाँचौं तथा अन्तिम मौद्रिक नीति हो । उनको कार्यकाल यसैवर्षको चैत अन्तिममा सकिँदै छ ।  उनले मौद्रिक नीति खुला भएर निकै लचिलो ल्याउने उद्घोष गरिसकेका छन् ।

संकलित सुझावपछि राष्ट्र बैंकले उपयुक्त ठानेका सुझावलाई मौद्रिक नीतिमार्फत सम्बोधन गर्दछ । राष्ट्र बैंकले १५ साउनभित्र मौद्रिक नीति ल्याउनेछ । देशको मूल्यवृद्धि नियन्त्रण, ब्याजदरको स्थायित्व, वित्तीय स्रोतको परिचालनका लागि मौद्रिक नीतिमार्फत व्यवस्था गरिन्छ ।

मौद्रिक नीति तर्जुमा कार्यविधि अनुसार आर्थिक वर्ष सकिएको १५ दिनभित्र वार्षिक नीति र त्रैमासिक तथा अर्धवार्षिक समीक्षा त्रैमास सकिएको ४५ दिनभित्र सार्वजनिक गर्ने व्यवस्था छ ।