कर्णालीको झोलुंगे पुलमा बिहानदेखि फसेमध्ये ९ वटा खच्चडको उद्धार, २ वटाको मृत्यु

२७ जेठ, काठमाडौं । कर्णाली नदीमाथिको झोलुंगे पुलको लट्ठा चुँडिदा फसेकामध्ये ९ वटा खच्चडको सकुशल उद्धार गरिएको छ भने २ वटाको मृत्यु भएको छ । बाँकी उद्धार गर्न कठिनाइ भइरहेको जिल्ला प्रशासन कार्यालय दैलेखका निमित्त जिल्ला अधिकारी गणेशप्रसाद कोइरालाले जानकारी दिए ।

अछामबाट दैलेख आउने क्रममा आज बिहान पुलको लट्ठा चुँडिदा फसेकामध्ये अझै २ वटाको उद्धार गर्न कठिन भएको हो । कोइरालाका अनुसार तिनको उद्धार गर्न अछामबाट सशस्त्रको अर्को टोली बोलाइएको छ ।  पुलबाटै उद्धार सम्भव नभएपछि तार काटेर कर्णालीमा खसालिएका खच्चडलाई नदीमा डुंगाबाट उद्धार गरिएको थियो ।

यो झोलुंगे पुलले सुदूरपश्चिम र कर्णाली प्रदेशलाई जोड्ने गर्दछ । पुल अछामको पञ्चदेवल विनायक नगरपालिका ९ र दैलेखको आठबीस नगरपालिका ४ लाई जोड्ने काम गर्दछ । पुलको लट्ठा चुँडिदा दैलेख–अछाम आउजाउ गर्नेसहित विद्यार्थीहरु पनि प्रभावित भएका छन् ।