कर्णाली नदीको झोलुंगे पुलमा फसेका २ वटाबाहेक सबै खच्चडको सकुशल उद्धार

२७ जेठ, काठमाडौं । कर्णाली नदीमाथिको झोलुंगे पुलमा फसेका २ बाहेक सबै खच्चडको उद्धार गरिएको छ । पुलमा फसेकामध्ये २ वटालाई बचाउन नसकिएको प्रहरीले जनाएको छ ।  आइतबार बिहान पुलको लठ्ठा चुँडिएर खच्चडहरू पुलमै फसेका थिए । पुलमा फसेको केही घन्टापछि सशस्त्र प्रहरी र नेपाल प्रहरीसहितको टोली पुगेर उद्धार गरेको हो । 

दैलेख र अछाम जोड्ने यो पुलका तारजाली कमजोर भएर चुँडिएसँगै चामल बोकेर फर्किएका खच्चडहरू फसेका थिए । दैलेख प्रहरी नायब उपरिक्षक (डीएसपी) सुनिल दाहालका अनुसार, सबै खच्चडको उद्धार सकिएको छ । फसेकामध्ये १० वटालाई खोलामा खसालिएको थियो भने ती मध्ये ८ वटाको सकुशल उद्धार भयो । 

बाँकी २ वटा नदीमा खस्दा ढुंगामा बजारिएपछि मृत्यु भएको प्रहरीले जनाएको छ । बाँकी रहेका तीनवटा खच्चडलाई भने पुलबाटै बाहिर निकालिएको थियो । लोड कम भएपछि तीनवटालाई तारको सहायताबाट नदीमा नखसालि निकालियो हो ।