राजदूत फिर्ताको निर्णय दुई दिन रोक्न पनि सकिन्थ्यो, ध्यान नगएकै हो : प्रधानमन्त्री

२८ जेठ, काठमाडौं । प्रधानमन्त्री पुष्पकमल दाहाल ‘प्रचण्ड’ले राजदूत फिर्ता गरिएका विषयलाई संयोगको संज्ञा दिएका छन् । भारतको दुई दिने औपचारिक भ्रमण पूरा गरी आज स्वदेश फिर्ता भएपछि त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा उनले भारतका लागि नेपाली राजदूत शङ्कर शर्माले राजदूतको हैसियतमा भ्रमण दलमा नै सहभागी भई भूमिका निर्वाह गरेको उल्लेख गरे ।

मन्त्रिपरिषदमा राजदूत फिर्ताबारे छलफल हुँदा त्यस बारेमा ध्यान भने नपुगेको स्वीकार गरे ।  ‘राजदूतज्यू मेरो भ्रमणमा पनि सँगै हुनुहुन्थ्यो । उहाँले सक्रिय भूमिका खेल्नुभयो । मैले उहाँलाई धन्यवाद भनेर आएको छु । त्यही बेला पर्नु संयोग हो । यो कुरा त्यति ध्यान कसैको पनि गएन । क्याबिनेटमा यो कुरा प्रस्तुत त भयो । तर, दुई दिन रोक्न पनि सकिन्थ्यो । ध्यान नगएकै हो’, प्रचण्डले भने ।

यसैगरी प्रधानमन्त्री प्रचण्डले वर्तमान सत्ता गठबन्धन पूरा कार्यकालसम्म जाने विश्वास व्यक्त गरेका छन् ।  उनले एमाले अध्यक्ष केपी शर्मा ओलीले पार्टी कार्यक्रममा व्यक्त गरेका कतिपय विचारका कारण सत्ता गठबन्धनमा कुनै असर नगर्ने उल्लेख गरे ।

भारत भ्रमणका क्रममा नेपाल–भारत सीमा विवाद, दक्षिण एसियाली क्षेत्रीय सहयोग सङ्गठन (सार्क), पञ्चेश्वर बहुउद्देश्यीय आयोजनालगायत विषयमा महत्वपूर्ण छलफल भएको उनले जानकारी दिए ।  प्रधानमन्त्री दाहालले आफ्ना भारतीय समकक्षी सँग दुई देश बीचको संयन्त्र मार्फत छलफल गरेर समस्या हल गर्नुपर्ने लगायतका विषयमा छलफल भएको उल्लेख गरे ।

भारतीय प्रधानमन्त्री नरेन्द्र दामोदर दास मोदीको शपथग्रहण समारोहमा भाग लिन प्रधानमन्त्री दाहाल आइतबार भारत भ्रमणमा गएका थिए ।