गृहमन्त्रीलाई शाहीको प्रश्न- जीबी राई ठुलो की सरकार, गिरिबन्धुको फाइल कहिले खुल्छ ?

२९ जेठ, काठमाडौं । राप्रपा सांसद ज्ञानेन्द्र बहादुर शाहीले गिरिबन्धु टी–स्टेट प्रकरणको फाइल कहिले खुल्छ भनेर सरकारलाई प्रश्न गरेका छन् । उनले गृहमन्त्री रवि लामिछानेलाई धेरै बकबक गर्नु भयो, अब गिरिबन्धु जग्गा प्रकरणको फाइल कहिले खोल्ने भन्दै प्रश्न गरे । 

मंगलबारको प्रतिनिधिसभा बैठकमा विशेष समय लिएर बोल्दै सांसद शाहीले गृहमन्त्री रवि लामिछानेलाई गिरी बन्धु प्रकरणको फाइल कहिले खुल्छ भन्दै प्रश्न गरेका हुन् । सांसद शाहीले गिरी बन्धु, वाइडबडी, फोर जी, मेलम्ची, टेरामेक्स फाइल कहिले खुल्छ भन्दै प्रश्न गरेका छन् ।

उनले जीबी राई ठुलो की सरकार ठुलो भन्दै अहिले जीबी राई ठुलो देखिएको बताउँदै उनले सरकारले जीबी राईलाई पक्राउ गर्न नसकेको आरोप लगाए । उनले जीबी राईलाई तत्काल पक्राउ गर्न माग गरेका छन् ।

उनले भने– आकाशमा भए पनि पातालमा भए पनि जीबी राईलाई खोजेर ल्याउँछु भनेर गृहमन्त्रीले भन्नु भएको थियो, कहिले ल्याउनुहुन्छ, हामीले हेरेर बसेका छौं ।’ सांसद शाहीले सुदूरपश्चिमकी चेली निर्मलाका हत्याराको कहिले पत्ता लाग्छ भन्दै गृहमन्त्रीलाई प्रश्न गरेका छन् ।