टी–२० विश्वकप : नामिबिया ९ विकेटले पराजित, लगातारको जितसँगै अस्ट्रेलिया ‘सुपर–८’ मा

३० जेठ, काठमाडौं । आईसीसी टी–२० विश्वकप क्रिकेटमा अस्ट्रेलियाले नामिबियामाथि ९ विकेटको जित निकालेको छ । बुधबार बिहान भएको खेलमा अस्ट्रेलियाविरुद्ध सुरुमा ब्याटिङ गरेको नामिबिया ७२ रनमा समेटिएको थियो। ७३ रनको लक्ष्य पछ्याएको अस्ट्रेलियाले ५.४ ओभरमा मात्र १ विकेट गुमाएर  ७४ रन बनाएको हो।

अस्ट्रेलियाका लागि ओपनर ट्रेभिस हेडले नटआउट सर्वाधिक ३४ रन बनाए। त्यसैगरी माइकल मार्सले १८, डेभिड वार्नरले २० रन बनाए । नामिबियाका लागि डेभिड वाइसले १ विकेट लिए । यसअघि टस हारेर पहिले ब्याटिङ गरेको नामिबियाले कप्तान गेहार्ड इरास्मसको ३६ रनको मदतमा १७ ओभरमा अलआउट हुँदै ७२ रन जोडेको थियो । 

नामिबियालाई सस्तैमा समेट्न अस्ट्रेलियाका लागि एडम जाम्पा एक्लैले चार विकेट लिए।  त्यस्तै जोश हेजलवुड र मार्कस स्टोइनिस दुई दुई विकेट हात पार्दा प्याट कमिन्स र नाथन एलिसले एकएक विकेट लिए।

तीन खेलमा लगातार विजयी हुँदै अस्ट्रेलिया नवौँ विश्वकपको ‘सुपर–८’ चरणमा पुग्ने दोस्रो टोली पनि बनेको छ । यसअघि बुधबार नै समूह ‘डी’ बा दक्षिण अफ्रिका ‘सुपर–८’ चरणमा पुगिसकेको छ । 
अस्ट्रेलिया तीन खेलबाट ६ अङ्क बटुल्दै  शीर्ष स्थानमा उक्लिएको छ।

समान खेल खेलेको स्कटल्याण्ड पाँच अंकसहित दोस्रो स्थानमा छ। नामिबिया दुई अंकसहित तेस्रो स्थामा छ। यो समूहमा दुई खेल खेलेको इंग्ल्याण्डले एक अंक जोडेको छ भने तीन खेल खेलेको ओमान अंकबिहीन छ।