उपत्यकामा २ दिनपछि मेलम्चीको पानी नआउने, ४ अर्ब लाग्नेमा ५० करोड मात्र छुट्याइयो बजेट

३० जेठ, काठमाडौं । मन्त्रिपरिषदको निर्णयअनुसार मेलम्ची खानेपानी विकास समितिले असारदेखि मेलम्चीको पानी काठमाडौं नपठाउने निर्णय गरेको छ । बर्खा सुरु भएकाले सुरुङलाई गेग्य्रान छिर्नबाट जोगाउन पानी बन्द गर्न लागिएको हो । गत बिहीबार बसेको मन्त्रिपरिषद् बैठकले बाँध क्षेत्र सार्ने निर्णय गरेसँगै समितिले हेडवर्कस सार्ने प्रक्रिया अगाडि बढाउने भएको हो ।

अहिले मेलम्चीबाट दिनको करिब २० करोड लिटर पानी आउने गरेको छ । तर पानी कति समयसम्म बन्द रहने यकिन नभएको मेलम्ची खानेपानी विकास समितिका कार्यकारी निर्देशक रत्नप्रसाद लामिछानेले बताए ।  मेलम्ची खानेपानी विकास समितिका अनुसार जेठ मसान्तबाट मेलम्चीको पानी उपत्यकामा नपठाउने निर्णय भएको छ । 

समितिले चौथो वर्ष पनि मेलम्चीको पानी उपत्यका पठाउन रोक लगाउन लागेको हो । ३२ जेठबाट उपत्यकामा पानी नपठाउने निर्णय भएको छ । तर, ठूलो पानी परेन र सुरुङ हुँदै सुन्दरीजलसम्म आउने पानीमा धमिलोपन बढेन भने दुई–तीन दिन पर धकेलिन पनि सक्छ, समितिका कार्यकारी निर्देशक रत्न लामिछानेले भने । गत १ माघदेखि मात्र उपत्यकावासीको धारामा पठाउन थालिएको थियो ।  

०७८ साल असारको बाढीले मेलम्ची मुहान क्षेत्रलाई क्षति गरेपछि काठमाडौं उपत्यकामा निरन्तर पानी वितरण हुन सकेको छैन । गत असारमा बन्द गरिएको पानी ६ महिनापछि अर्थात् माघ १ देखि उपत्यकामा वितरण गरिएको थियो । तीन वर्षदेखि मेलम्चीको पानी सुक्खा मौसममा मात्र काठमाडौंमा वितरण गरिँदै आएको छ ।

बाढी आएर बाटो बन्द हुने खतरा रहेको ठाउँनजिकै एक्स्काभेटर तयारी अवस्थामा राखिएको लामिछानेले जानकारी दिए । एक्स्काभेटर बर्खाभर त्यही राखिने उनको भनाइ छ । मेलम्चीबाट सुरुमा १७ करोड लिटर पानी आइरहेको थियो । काठमाडौंमा पानीको माग धेरै भएपछि पछि थप गरेर २० करोड लिटर पुर्याइएको हो ।

गत बिहीबार बसेको मन्त्रिपरिषद् बैठकले हेडवर्क्स (बाँध क्षेत्र) सार्ने निर्णय गरेसँगै समितिले हेडवर्क्स सार्ने प्रक्रिया अगाडि बढाउने भएको हो । यसका लागि असारभित्र परामर्शदाता नियुक्त गर्न सूचना निकाल्नेछ । ‘हेडवर्क्स सार्ने ठाउँको विस्तृत अध्ययनका लागि अन्तर्राष्ट्रिय परामर्शदाता खोजि भइरहेको छ । 

नयाँ हेडवर्क्स निर्माणका लागि चार अर्ब लाग्ने अनुमान छ भने सरकारले मेलम्ची खानेपानी आयोजनाका लागि जम्मा ५० करोड बजेट छुट्याएको छ । आर्थिक वर्ष ०८१÷८२ को बजेट सार्वजनिक गर्दै अर्थमन्त्री वर्षमान पुनले मेलम्ची खानेपानीका लागि ५० करोड छुट्याएको बताएका थिए ।