कांग्रेसले सत्ता खौज्दैन, अप्ठ्यारो परेपछि सत्ताले आफै कांग्रेस खोज्छः नेता कोइराला

३० जेठ, काठमाडौं । नेपाली कांग्रेसका वरिष्ठ नेता डा. शेखर कोइरालाले कांग्रेसले कहिल्यै पनि सत्ताका लागि मरिहत्ते नगरेको बताएका छन् । उनले कांग्रेस सरकारमा जाने गरी कुनै पनि तयारीमा नबस्ने दावी गरेका छन् । आफैँ सत्ता कांग्रेसको हातमा आउने गरेको भन्दै उनले तत्काल सरकारमा जाने कुनै तयारी नभएको भनाइ राखेका छन् ।  

बुधबार राजधानी काठमाडौंमा नेपाल वित्तीय संस्था कर्मचारी संघ, नेपाल बैंक लिमिटेडको दशौँ केन्द्रीय महाधिवेशनको उद्घाटन कार्यक्रममा उनले समय नआएसम्म कांग्रेस विपक्षमा बस्ने जानकारी दिए । कांग्रेस सरकारमा जान्छ कि जाँदैन भनेर सोध्नुहुन्छ । हामीले विपक्षको भूमिका खेल्ने हो । सरकारमा जाने हतारो छैन । आउने भए त्यसै आउँछ । कोसिस गरेर मरिहत्ते गरेर सरकारमा कांग्रेस जाँदैन,उनले भने । 
 
नेता कोइरालाले दल फुटाउने र व्यक्तिलाई दुख दिने काम गरेर अघि बढ्ने हो भने कही पनि पुग्न नसकिने बताए । साथै उनले, जबसम्म सुशासन र पारदर्शीका साथै भ्रष्टाचारको कुरा छिनोफानो गरेर अघि जान नसके देशमा आर्थिक विकास हुन नसक्ने बताए । यो कुरालाई नेपाली कांग्रेसले गम्भीर विषय लिएको र अन्य दलसँग छलफल अघि बढ्ने उनले बताए । 

 
कोइरालाले राजनीतिक स्थिरता र सरकारको स्थिरता कसरी छिनोफानो हुन्छ भनेर राजनीतिक दलहरू बीचमा छलफल अघि बढिरहेको जानकारी दिए । सरकार अस्थिर बनाउन निर्वाचन प्रणाली पनि कारक भएको भन्दै उनले यसका लागि संविधानमा केही सुधार र परिवर्तन गरेर अघि बढेर जान सक्यौँ भने मात्र देश अघि बढ्ने बताए । 

राजनीतिमा अपराधीकरण गम्भीर भएर गएको उल्लेख गर्दै उनले राज्यको संयन्त्रले अनावश्यक दुख दिने गरेको भन्दै आपत्ति जनाए । धेरै ठाउँमा अनावश्यक हिसाबले अख्तियारले, निर्वाचन आयोगले, सीआईबीले दुख दिइरहेको देख्नु भएकै छ । यो दुर्भाग्य हो र किन भइरहेको छ ? यो कुरा राजनीतिक दलहरूको बीचमा छलफल हुन जरुरी छ, उनले भने ।