वर्षाका कारण अमेरिका मै रोकियो नेपाली क्रिकेट टोली, वेस्ट इन्डिज जाने उडान रद्द

३१ जेठ, काठमाडौं । अमेरिकामा रहेको नेपाली क्रिकेट टोली लगातारको वर्षाले मौसम खराब भएका कारण वेस्ट इन्डिज जानबाट रोकिएको छ । मौसममा खराबी आएपछि आईसीसी टी–२० विश्वकप क्रिकेट खेल्न वेस्ट इन्डिज उड्न लागेका नेपाली खेलाडी बुधबार अमेरिका मै रोकिएका हुन् । 

नेपाल क्रिकेट संघका अनुसार निरन्तर वर्षाका कारण अन्तर्राष्ट्रिय उडान रद्द भएपछि नेपाली क्रिकेट टोलीको यात्रा पनि प्रभावित भएको हो । आईसीसी टी–२० विश्वकप अन्तर्गत समूह चरणका २ खेल खेल्न नेपाली टिम बुधबार वेस्ट इन्डिज जाने तालिका थियो ।

वेस्ट इन्डिजमा नेपालले दक्षिण अफ्रिका र बंगलादेशसँग खेल्ने तालिका छ । भारी वर्षाका कारण मंगलबार श्रीलंका र नेपाल बीचको खेल पनि रद्द हुन पुगेको थियो । खेल रद्द हुँदा दुवैले अंक बाँडेका थिए । नेपाल आईसीसी टी–२० विश्वकप अन्तर्गत पहिलो खेलमा नेदरल्यान्ड्ससँग पराजित भएको थियो ।