विश्वकपबाट बाहिरियो श्रीलंका

३२ जेठ, काठमाडौं । श्रीलंका जारी टी-२० विश्वकपबाट बाहिरिएको छ । गएराति सम्पन्न समूह 'डी' अन्तर्गतको खेलमा बंगलादेशले नेदरल्याण्डसलाई पराजित गरेसँगै श्रीलंका सुपर आठको दौडबाट बाहिरिएको हो । यस खेलमा बंगलादेशले नेदरल्याण्डसलाई २५ रनले पराजित गरेको थियो ।

बंगलादेशले दिएको १६० रनको लक्ष्य पछाएको नेदरल्याण्डस २० ओभरमा ८ विकेट गुमाउँदै १३४ रन बनाएपछि बंगलादेश २५ रनले विजयी भएको थियो । यस अघि बंगलादेशले पहिला ब्याटिङ गर्दै २० ओभरमा ५ विकेट गुमाएर १५९ रन बनाएको थियो । यो खेलपछि समूह डी मा बंगलादेशले ३ खेलमा २ जित र एक हारसँगै ४ अंक भएको छ र दोस्रो स्थानमा रहेको छ ।

त्यस्तै नेदरल्याण्डसको ३ खेलमा एक जित र २ हारसहित २ अंक भएको छ र तेस्रो स्थानमा छ । यसै समूहमा रहेको नेपालको २ खेलमा एक अंक रहेको छ । त्यस्तै श्रीलंकाले ३ खेलमा २ हार र नेपालविरुद्धको खेल वर्षाले रुद्ध हुँदा एक अंक हासिल गरेको छ । योसँगै श्रीलंकाको विश्वकप यात्रा समूह चरणबाटै सकिएको छ । 

यस समूहबाट दक्षिण अफ्रिकाले लगातार तीन खेलमा जित हासिल गर्दै सुपर आठमा पुगिसकेको छ । अब सुपर आठको दौडमा बंगलादेश नेदरल्याण्डस र नेपाल रहेका छन् । अब दक्षिण अफ्रिका र नेपालबीच शनिबार बिहान खेल हुने छ भने जुन १७ मा नेपाल र बंगलादेशबीच खेल हुँदै छ । त्यस्तै जुन १७ मै नेदरल्याण्डस र श्रीलंका खेल्ने छन् ।