सप्तकोशी विकास बैंकका तत्कालीन सीइओ सुवेदी भ्रष्टाचारी ठहर, ३९ महिना कैद र २ करोडमाथि जरिवाना

३२ जेठ, काठमाडौं । विशेष अदालतले सप्तकोशी विकास बैंकका तत्कालीन कार्यकारी अधिकृत नवीन सुवेदी सम्पत्ति शुद्धीकरण मुद्दामा दोषी ठहर गरेको छ । अदालतले सुवेदी कार्यालय प्रमुख भएकाबेला पदको दुरुपयोग गरि कसुर गरेको ठहर गर्दै थप २ महिना १८ दिन कैद र २३ लाख ७५ हजार ५४० रुपैयाँ थप जरिवानाको पनि सजाय गरेको छ । 

विशेष अदालतका अध्यक्ष टेकनारायण कुँबर, सदस्यद्वय रामबहादुर थापा र मुरारीबाबु श्रेष्ठको इजलाशले सुवेदीलाई शुक्रबार दोषी ठहर गर्दै ३ वर्ष ३ महिना १८ दिन कैद र २ करोड ३६ लाख ५४ हजार ४ सय जरिवानाको सजाय सुनाएको हो । अदालतले बिगो बराबरको सम्पत्ति जफत गर्न आदेश दिएको छ ।

 २०८० असारमा सम्पत्ति शुद्धीकरण अनुसन्धान विभागले सुवेदीविरुद्ध १ करोड १८ लाख ७७ हजार ७ सय रुपैयाँ बिगो मागदाबीसहित बिगोको दोब्बर जरिवाना र कैद सजाय मागदाबीसहित मुद्दा दायर गरेको थियो । बैंकको रेमिटेन्सको १६ करोड रकम हिनामिना गरेको आरोप उनीमाथि लागेको थियो ।