कावासोती नगरपालिका कार्यालय र मेयरको घरमा आक्रमण गर्ने स्थानीयमाथि हवाई फायर र अश्रु ग्याँस प्रहार

३२ जेठ, नवलपरासी । बर्दघाट–सुस्ता पूर्वको कावासोतीमा ड्रेन निर्माण गर्ने क्रममा पुरिएर तीन जना मजदुरको मृत्यु भएपछि स्थानीयले नगरपालिकाको कार्यालय नगर प्रमुखको घरमा ढुंगामुढा गरेका छन् । शुक्रबार दिउँसो वडा नम्बर २ मा रहेको नगरपालिकाको भवनमा स्थानीयले ढुंगामुढा गरेका हुन् । 

पूर्वी नवलपरासीको सदरमुकाम कावासोतीमा ढल खन्ने क्रममा बिहीबार ३ महिला मजदुरको मृत्यु भएको थियो । आक्रोसित आफन्तहरुले नगरपालिका र मेयरको घर तोडफोड गरेका छन् । प्रहरीले स्थिति नियन्त्रणमा लिन भन्दै दर्जनौँ राउण्ड हवाई फायर र अश्रु ग्याँस प्रहार गरेको छ । 

मृतकले क्षतिपूर्ति र दोषीलाई कारबाहीको माग गर्दै उनीहरुले नाराबाजी गरिरहेका छन् । आक्रोशित भीडले मेयरको घरमा आगजनी समेत गरेका छन् । कावासोती बजारमा ठुलो संख्यामा प्रहरी परिचालन गरिएको छ । प्रदर्शनकारीले मेयरको घरमासमेत आगजनीको प्रयास गरेका छन् ।

कावासोती नगरपालिका–२ फलफुल चोकमा नाला निर्माणमा खटिएका कावासोतीका ५१ बर्षिया सेती राना, २६ वर्षकी तानमया मगर र ३२ वर्षिया चमेली सिंजालीको बिहीबार ढिस्कोले पुरेर मृत्यु भएको थियो । उनीहरु सबै कावासोती नगरपालिका वडा नम्बर ५ निवासी हुन् । अहिले नगरपालिका भवनमा नगरपालिकाका पदाधिकारी,  प्रहरी, पिडित पक्ष, स्थानीय लगायतबीच छलफल जारी छ ।