गण्डकीका ऊर्जामन्त्री फणिन्द्र देवकोटा सांसदबाट पदमुक्त

३२ जेठ, पोखरा । गण्डकी प्रदेशका ऊर्जा मन्त्री फणिन्द्र देवकोटाको सांसद पद गुमेको छ । माओवादीको चुनाव चिह्नबाट निर्वाचित भएका देवकोटाले पार्टीको नीति विपरीत मुख्यमन्त्री सुरेन्द्रराज पाण्डेलाई फ्लोर क्रस गरेर विश्वासको मत दिएको आरोपमा उनलाई कारवाही गरिएको हो । सांसदबाट पद गए पनि मन्त्रीको पद भने कायमै छ । उनी ६ महिनासम्म मन्त्री बन्न सक्नेछन् ।

प्रदेश सभाको शुक्रबार बसेको दोस्रो बैठकमा सभामुख कृष्ण धितालले देवकोटा पदमुक्त भएको सूचना दिएका हुन् । नेपाल समाजवादी पार्टी (नेसपा)का नेता देवकोटाले गोरखा २ (क) मा माओवादीको चुनाव चिह्नबाट निर्वाचन लडेका थिए । माओवादी संसदीय दलको ह्विप उल्लंघन गर्दै २८ जेठमा मुख्यमन्त्री सुरेन्द्रराज पाण्डेलाई विश्वासको मत दिएका देवकोटा भोलिपल्ट ऊर्जा मन्त्री बनेका थिए ।

माओवादी केन्द्रले ह्विप उल्लंघनमा कारबाही गर्दै सभामुखलाई पत्र दिएको थियो । यससँगै सांसद पद गएको छ । माओवादीको निर्णयअनुरुप नै सभामुख कृष्णप्रसाद धितालले उनको पद रिक्त भएको सूचना प्रदेशसभामा वाचन गरेका हुन । उनलाई कारबाही गरिएको माओवादी संसदीय दलका नेता हरिबहादुर चुमानले बताए ।

माओवादीले उनलाई राजनीतिक दलसम्बन्धी ऐन २०७३ को दफा २८ अनुसार कारबाही गरेको हो । यो धाराको उपधारा १ मा, ‘संसदीय दलका नेताको निर्देशन बमोजिम त्यस्तो दलको सचेतकले देहायका प्रस्तावमा संघीय संसदको कुनै सदन वा प्रदेश सभामा हुने मतदानमा त्यस्तो प्रस्तावको पक्ष वा विपक्षमा मतदान गर्न संसदीय दलको सदस्यलाई निर्देशन ‘ह्विप’ जारी गर्न सक्नेछ’ भन्ने उल्लेख गरिएको छ ।