विश्वकपमा नामिबियामाथि इङल्याण्ड ४१ रनले विजयी

२ असार, काठमाडौं । इङल्याण्डले जारी टी-२० विश्वकप अन्तर्गत नामिबियालाई ४१ रनले पराजित गरेको छ । गएराति सम्पन्न खेलमा इङल्याण्डले नामिबियालाई डक वर्थ लुइस नियम अनुसार ४१ रनले पराजित गरेको हो । 

वर्षाले प्रभावित भएको खेल १०-१० ओभर खेलाइएको थियो । इङल्याण्डले दिएको १२६ रनको लक्ष्य पछाएको नामिबियाले १० ओभरमा ३ विकेट गुमाउँदै ८४ रन बनाएको थियो । यसअघि इङल्याण्डले पहिला ब्याटिङ गर्दै १० ओभरमा ५ विकेट गुमाएर १२२ रन बनाएको थियो ।

वर्षाले खेल अवरुद्ध भएपछि डक वर्थ लुइस नियम अनुसार नामिबियाले १० ओभरमा १२६ रनको लक्ष्य पाएको थियो । यो जितपछि इङल्याण्डको ४ खेलमा ५ अंक भएको छ र समूह बी मा दोस्रो स्थानमा उक्लिएको छ ।

अब इङल्याण्डको सुपर आठको यात्रा अस्ट्रेलिया र स्कटल्याण्डबीचको खेलको नतिजाले तय गर्ने छ । अस्ट्रेलियाले यो खेल जितेमा इङल्याण्ड सुपर आठमा जाने छ भने स्कटल्याण्डले जितेमा इङल्याण्ड बाहिरिने छ । त्यस्तै नामिबिया भने विश्वकपबाट बाहिरिएको छ ।