कांग्रेस र एमालेका प्रतिनिधिले बहिष्कार गरेपछि काठमाडौं महानगरको नगरसभा बैठक १० गतेसम्म स्थगित

२ असार, काठमाडौं । नेपाली कांग्रेस र नेकपा एमालेका वडाध्यक्षहरुले नगरसभाको बैठक बहिष्कार गरेर सभाहलबाट बाहिरिएपछि काठमाडौं महानगरपालिकाको नगरसभा बैठक स्थगित भएको छ ।  मेयर बालेन शाहले कार्यपालिकाको बैठक असार १० गतेसम्म स्थगित गरेका छन् । मेयर शाहले नगरसभा स्थगित भएपछि आक्रोश पनि पोखेका छन् ।

वडा सदस्यहरूले विरोध गरेपछि काठमाडौं महानगरपालिको १५ औं नगरसभाको दोस्रो बैठक असार १० गते सम्मका लागि स्थगित भएको छ । शाहले आर्थिक वर्ष २०८१/८२ का लागि जेठ ३२ गते प्रस्तुत भएका वार्षिक नीति तथा कार्यक्रममाथि बोल्न चाहने सदस्यहरूलाई ५ मिनेटभित्र नाम टिपाउन समय दिएका थिए । यसपछि कांग्रेस र एमालेका वडाध्यक्षहरुले नगरसभाको बैठक बहिष्कार गरेर सभा हलबाट उठेर गएको उनले बताएका छन् । 

नयाँ सडकलाई नो भेहिकल जोन बनाउने काठमाडौं महानगरपालिकाका मेयरको प्रस्तावलाई आज बस्ने नगर सभामा पारित गर्ने तयारी गरेका थिए । यो सम्भव नभएपछि मेयर शाहले आक्रोश पोखेका हुन् । 

न्युरोडको नयाँ सडकलाई नो भेइकल जोन बनाउने प्रस्ताव मेयर शाहले नगरसभामा पारित गराउन खोजेको भन्दै असन्तुष्टि जनाएर केही कार्यपालिका सदस्यहरूले बैठक बहिष्कार गरेका थिए । मेयर शाहले ३ जना नेताले गर्दा ,१६० जना जनप्रतिनिधिको बोल्ने अधिकार हनन भएको बताएका छन् ।