दोलखा घर भएका अजितले आफैले बोकेको राइफलबाट निधारमा गोली हानेको प्रहरीको निष्कर्ष

५ असार, काठमाडौं । नयाँ बानेश्वरस्थित संसद् भवनको सुरक्षामा खटिएका अजित गोलेले आफैंले बोकेको राइफलले अनुहारमा गोली हानेको प्रहरीको प्रारम्भिक अनुसन्धानबाट देखिएको छ । संसद भवनभित्र मृत अवस्थामा भेटिएका उनले आत्महत्या गरेको प्रहरीको निष्कर्ष छ ।

कार्यदलबाट खटिएका उनले आफैंले निधारमा गोली हानेको पाइएको काठमाडौं प्रहरी परिसरका एसपी नवराज अधिकारीले जानकारी दिए । उनी बिहान ड्युटीमै खटिएका थिए । दोलखाको मेलुङ गाउँपालिका–४ घर भएका प्रहरी जवान २२ वर्षीय अजित गोलेले आफैंले बोकेको इन्सास राइफलले आफैंलाई गोली हानेको पाइएको हो । 

एसपी अधिकारीका अनुसार गोलेले आफ्नै निधारमा गोली हानेका हुन् । उनको शव बुधबार बिहान संसद भवनको पश्चिमतर्फको २ नम्बर गेटको बायाँतर्फ रहेको शौचालयमा भेटिएको थियो । उनी बिहान ६ बजेदेखि १० बजेसम्मको ड्युटीमा २ नम्बर गेटमा हतियारसहित सुरक्षार्थ खटिएका थिए ।