सहकारी ठगीका विषयमा प्रहरी महानिरीक्षक र कानुन व्यवसायीसँग संसदीय समितिको छलफल

५ असार, काठमाडौं । कार्यविधि बनाएपछि संसदीय छानबिन विशेष समितिले सहकारी ठगी सम्बन्धको अनुसन्धानलाई अगाडि बढाउन थालेको छ । यसै क्रममा समितिले नेपाल प्रहरीका महानिरीक्षक बसन्तबहादुर कुँवर र केही कानुन व्यवसायीसँग सिंहदरबारमा छलफल गरेको छ । 

बुधबार बिहान ११ बजेदेखि सिंहदरबारमा समितिको छलफल चलिरहेको छ । गृहमन्त्री रवि लामिछाने सम्बद्ध सहकारीका विषयमा सीआईबीसँग समितिले छलफल गर्ने तयारी गरेको छ । कानुन व्यवसायी र प्रहरी महानिरीक्षकसँग छलफल सकिन लागेको समितिले जनाएको छ । आज सीआईबीको रिपोर्ट मौखिक होइन लिखित डकुमेन्ट माग्ने तयारी छ ।  
 
समस्याग्रस्त २० वटा सहकारीका अध्यक्ष र पदाधिकारीहरूले प्रतिवेदन बुझाएका थिए । तीन वटा सहकारीको समस्या समाधान भइसकेको समितिलाई जानकारी गराइएको छ । न्यौपानेका अनुसार समितिलाई म्यान्डेट दिएका ९ वटा (उपप्रधान तथा गृहमन्त्री रवि लामिछाने मुछिएका) सहकारीको कागजात उपलब्ध गराउन समितिले भनेको छ ।