कांग्रेसले स्वर्गीय नेता गिरिजाप्रसाद कोइरालाको जन्म शताब्दी भव्य रुपले मनाउने

५ असार, काठमाडौं । नेपाली कांग्रेसले स्वर्गीय नेता गिरिजाप्रसाद कोइरालाको जन्म शताब्दी भव्य रुपमा मनाउने भएको छ । यही असार १८ गतेदेखि तीन दिनसम्म कांग्रेस पार्टी कार्यालय सानेपामा कोइरालाको जन्म शताब्दी मनाउन लागिएको हो । कांग्रेसले यसअघि वीपी महोत्सव पनि भव्य रुपमा मनाएको थियो । 

नेपाली कांग्रेस सूचना, सञ्चार तथा प्रचार विभागले कोइरालाको जन्म शताब्दी मनाउने तयारी थालेको छ । विभागको बुधबार बसेको बैठकले विभिन्न कार्यक्रम आयोजना गरी तीन दिनसम्म कार्यक्रम राख्ने निर्णय गरेको छ । कोइरालाका जीवनकालमा खिचिएका दुर्लभ फोटो प्रदर्शनी, चित्रकला प्रदर्शनी, विचार गोष्ठी लगायत कोइरालाको समयकालमा भएका गतिविधि र राजनीतिक घटनाहरूलाई समेटेर कार्यक्रम बनाइने विभागले जनाएको छ ।    

कोइरालाको जन्म वि.सं १९८१ असार १८ मा भारतको बिहार राज्यका टेडी सहर्षामा भएको थियो भने  ८५ वर्षको उमेरमा २०६६ चैत ७ मा उनको निधन भएको थियो । कोइराला मुलुकमा पाँच पटक प्रधानमन्त्री र चार कार्यकाल कांग्रेसको पार्टी सभापति भएका थिए । १० वर्षे जनयुद्धलाई अन्त्य गराएर माओवादीलाई शान्ति प्रक्रियामा ल्याउन कोइरालाले अग्रणी भूमिका रहेको थियो । 

सशस्त्र विद्रोह सञ्चालन गरेको तत्कालीन नेकपा माओवादीलाई राजनीतिको मूलधारमा ल्याउने र गणतन्त्र स्थापनाको प्रमुख श्रेय गिरिजाप्रसादलाई नै जान्छ । उनको जन्म शताब्दीमा विभिन्न दलका नेता, व्यापारी, लेखक, बुद्धिजीवी, समाजसेवी, नागरिक समाज, कलाकार लगायतका क्षेत्रमा कार्यरत रहेकाहरू निमन्त्रण पठाइने आजको बैठकले निर्णय गरेको छ ।