माधव नेपाल फकाउँदै प्रचण्डः ज्वाईलाई राजदूत, छोरीलाई मेडिकल काउन्सिल

९ असार, काठमाडौं । वर्तमान सरकारमा समस्या उत्पन्न हुने देखिएपछि प्रधानमन्त्री एवं माओवादी अध्यक्ष प्रचण्डले नेकपा एकीकृत समाजवादीका अध्यक्ष माधवकुमार नेपाललाई फकाउन थालेका छन् । प्रधानमन्त्री प्रचण्डले नेपालकी छोरी डा. सुमन नेपाल नेपाल मेडिकल काउन्सिलको सदस्यमा नियुक्ति गरेका छन् भने अष्ट्रेलियाका राजदूतलाई पनि फिर्ता बोलाएका छैनन् । गत दुई साताअघि बसेको मन्त्रिपरिषद्को बैठकले डा. सुमनलाई मेडिकल काउन्सिलको सदस्यमा नियुक्त गरेको हो ।

तत्कालीन स्वास्थ्य तथा जनसंख्यामन्त्री मोहनबहादुर बस्नेतको पालादेखि नेता नेपालले छोरीलाई नेपाल मेडिकल काउन्सिलको सदस्य बनाउने प्रयास गरिरहेकोमा स्वास्थ्य मन्त्रीमा प्रदीप यादव आएपछि सफल भएको हो । बस्नेतपछि उपेन्द्र यादव हुँदै प्रदीप यादव स्वास्थ्यमन्त्री बने । छाला रोग विशेषज्ञ माधवकी छोरी डा. सुमन बल्ल नेपाल मेडिकल काउन्सिलको सदस्य नियुक्त भइन् ।

माधव नेपालले भारतीय दूतावासलाई खुशी पारेर सांस्कृतिक छात्रवृत्ति (कल्चरल सीट)मा छोरी सुमनलाई डाक्टर पढाएका हुन् । सुमनले कल्चरल सीटमा नयाँ दिल्लीस्थित अल इन्डिया इन्स्टिच्युट अफ मेडिकल साइन्सेस (एम्स)बाट एमबीबीएस र एमडी गरेकी थिइन । उनका छोराले पनि भारतीय दूतावास कै कल्चरल सीटमा आन्ध्र प्रदेशबाट इन्जिनियरिङ गरेका हुन् ।

नेपाल मेडिकल काउन्सिलको सदस्यमा माधव नेपालकी छोरी डा. सुमनसहित चिकित्सा शास्त्र अध्ययन संस्थान (आईओएम)की डीन प्रा.डा. दिव्यासिंह शाह, डा. कुम्भराज जोशी, प्रा.डा. रविन्द्रमान श्रेष्ठ, डा. मधु न्यौपाने र डा. वीरेन्द्रबहादुर प्रधान नियुक्त भएका छन् । दिव्या शाह डीन छहुञ्जेल मात्र नेपाल मेडिकल काउन्सिलको सदस्यको रूपमा रहने छिन् । दिव्या शाह पूर्व प्रधानमन्त्री केपी ओलीकी निजी चिकित्सक हुन ।

नेपालकी छोरी सुमनलाई मेडिकल काउन्सिलको सदस्य नियुक्ति गर्ने मन्त्रिपरिषद्को बैठकले भारत, अमेरिका, बेलायतसहित ११ देशको राजदूत फिर्ता बोलायो तर, सँगै नियुक्त भएका अस्ट्रेलियाका राजदूत माधव नेपालका बहिनीज्वाई कैलाश पोखरेललाई भने फिर्ता बोलाएन । पछिल्लो समय माधव नेपाल समूहलाई अन्य नियुक्तिमा पनि समानुपातिक रुपमा सहभागी गराउने प्रचण्डले आश्वासन दिएका छन् । तर नेपालले हरेक नियुक्तिमा आफ्नो दललाई सहभागी नगराएको गुनासो गर्दै आएका छन् ।