प्रधानमन्त्रीले कुनै निर्णय नदिएपछि राजीनामा दिने तयारीमा मुख्यसचिव अर्याल

९ असार, काठमाडौं । प्रधानमन्त्री पुष्पकमल दाहाल प्रचण्डले कुनै निर्णय नदिएपछि मुख्यसचिव बैकुण्ठ अर्यालले पदबाट राजीनामा दिने तयारी गरेको बताइएको छ । अख्तियार दुरुपयोग अनुसन्धान आयोगले आफूविरुद्द भ्रष्टाचार अभियोगमा मुद्दा दायर गर्ने भएपछि उनले प्रधानमन्त्रीसँग परामर्श लिएका थिए । 

प्रधानमन्त्री कार्यालय स्रोतले दिएको जानकारी अनुसार प्रधानमन्त्रीले अब तपाई आफ्नै विवेक प्रयोग गर्नुस्, मैले केही सल्लाह दिन मिल्ने अवस्था रहेन भनेका थिए । त्यसपछि उनी राजीनामा दिने मुड बनाएर कार्यालयबाट बाहिरिएका थिए । तर, अहिलेसम्म राजीनामा बुझाएका छैनन् ।  

उनी विरुद्ध मुद्दा दर्ता गर्न अख्तियारको टोली विशेष अदालत पुगिसकेको छ । राज्यको एउटा संवैधानिक निकायले मुद्दा दर्ता गरेपछि पदमा बस्न मिल्दैन । त्यो भन्दा अगाडि नै राजीनामा दिने वा नदिने तपाईंको विचारको कुरा भयो भन्दै प्रधानमन्त्रीले सहयोग गर्न नसक्ने बताएका थिए ।