निमित्त मुख्य सचिवको जिम्मेवारी सचिव गडतौलालाई

९ असार, काठमाडौं । मुख्यसचिव डा.बैकुण्ठ अर्याल निलम्बनमा परेपछि प्रधानमन्त्री तथा मन्त्रिपरिषद्को कार्यालयका वरिष्ठ सचिव लीलादेवी गडतौलाले स्वतः निमित्त मुख्य सचिवको जिम्मेवारी पाएकी छन् । उनलाई वरिष्ठ सचिवमध्येबाट निमित्त मुख्यसचिव बनाइएको हो । प्रधानमन्त्री पुष्पकमल दाहाल प्रचण्डले लीलालाई भदौसम्म निमित्त मुख्यसचिवको जिम्मेवारी दिएका हुन् ।
 
सचिव गड्तौला साढे ३ वर्ष अघि २०७७ कात्तिक गते नेपाल न्याय सेवाको कानून समूहतर्फ सहसचिवबाट सचिवमा बढुवा भएकी थिइन । उनी प्रधानमन्त्री तथा मन्त्रिपरिषद्को कार्यालयमा कानून तथा मानव अधिकार क्षेत्र हेर्दै आएकी छन् । ५८ वर्षे उमेरहदका कारण गड्तौलाले आगामी भदौ महिनामा अनिवार्य अवकाश पाउनेछिन् ।