भ्रष्टाचार मुद्दापछि निलम्बनमा परेका मुख्यसचिव अर्यालको योजना आयोगमा सरूवा

१० असार, काठमाडौं । सरकारले निलम्बनमा रहेका मुख्यसचिव बैकुण्ठ अर्याललाई राष्ट्रिय योजना आयोगमा नयाँ पद सिर्जना गरी सरुवा गरिएको छ । सोमबार बिहान बसेको मन्त्रिपरिषद बैठकले भ्रष्टाचार मुद्दा लागेपछि स्वतः निलम्बनमा परेका अर्याललाई योजना आयोगमा सरुवा गर्ने निर्णय गरेको हो । 

मन्त्रिपरिषद बैठकले योजना आयोगमा सचिव पद सिर्जना गरेर अर्याललाई उक्त पदमा सरुवा गर्ने निर्णय भएको हो । निमित्त मुख्यसचिवको जिम्मेवारी लिलादेवी गड्तौलालाई दिने मन्त्रिपरिषद बैठकले निर्णय गरेको छ ।

प्रधानमन्त्री तथा मन्त्रिपरिषद कार्यालयमा रहेका वरिष्ठ सचिवहरू मध्येबाट गड्तौलालाई निमित्त मुख्यसचिवको जिम्मेवारी दिइएको हो । सरकारकी प्रवक्ता रेखा शर्माले दिएको जानकारीअनुसार अर्याललाई मुख्यसचिव सरहकै विशेष पद सिर्जना गरेर सरुवा गर्ने निर्णय मन्त्रिपरिषदले गरेको हो ।