कोशी सरकारविरुद्ध केदार कार्कीले दिएको रिटमाथि आज विपक्षी तर्फको बहस, वादीतर्फको सकियो

१० असार, काठमाडौं । मुख्यमन्त्री केदार कार्कीले कोशी सरकार गठनविरुद्ध दिएको रिटमाथि सर्वोच्च अदालतको पूर्ण इजलासमा सुनुवाइ जारी छ । गत जेठ ३१ मा सुनुवाइ नसकिएर हेर्दाहेर्दैमा राखिएको यो रिट न्यायाधीशहरू कुमार रेग्मी, नहकुल सुवेदी र अब्दुल अजीज मुसलमानको पूर्ण इजलासमा सुनुवाइ निरन्तर राखिएको हो ।  

रिट निवेदक कार्कीका तर्फबाट दायर रिट कर्ता तर्फको बहस आइतबार सकिएको छ । सोमबार प्रतिवादी कोसी सरकारका बहालवाला मुख्यमन्त्री हिक्मत कार्कीका तर्फबाट बहस हुँदैछ । बहसबाट संविधान र संसदीय प्रक्रिया महत्त्वपूर्ण हुन्छ वा संसदभन्दा बाहिरबाट सरकार बनाउन मिल्छ भन्ने विषय टुंग्याएपछि पूर्ण इजलासले फैसला दिने छ । 

पूर्ण इजलासमा प्रतिपक्षीले धेरै जना वकिलको नाम लेखाएकाले बहस अझै लम्बिन सक्ने सम्भावना छ । सोमबार प्रतिवादीको बहस टुंगिएमा मंगलबार जवाफी बहसपछि फैसला आउन सक्ने बताइएको छ ।  सरकार बन्ने र ढल्ने स्पष्ट व्यवस्था संविधानमा हुँदा हुँदै संकल्प प्रस्तावले तोकेको मितिमा विश्वासको मत नलिएको भनेर प्रदेश प्रमुख खापुङले नयाँ मुख्यमन्त्री नियुक्त गर्नु असंवैधानिक भएको रिटमा दाबी छ । 

यो बसपछि संविधानको धारा १६८ (५) अनुसार बनेको सरकारको आयु कति हुन्छ भन्ने प्रश्नको जवाफ आउनेछ । सरकार परिवर्तनका लागि संकल्प प्रस्तावको प्रयोग हुन्छ वा हुँदैन, अविश्वासको प्रस्ताव बिनै मुख्यमन्त्री हटाउन मिल्छ वा मिल्दैन भन्ने विषय न्यायाधीशहरूले सोधिरहेका छन् ।