एनआईसी एशिया बैंकका ग्राहकले कर्जा तिर्दा बम्पर छुट पाउने, जरिवाना तथा हर्जाना रकममा पुरै छुट र साधारण ब्याजमा ३५ प्रतिशत छुट दिने

१० असार, काठमाडौं । एनआईसी एशिया बैंकले आर्थिक मन्दीका कारण ऋणको सावा ब्याज भुक्तान गर्न नसकेका ग्राहकहरूका लागि भारी छुटको योजना ल्याएको छ । बैंकले २०८० चैत्र मसान्तसम्ममा भाखा नाघेका कर्जाहरुको हकमा सम्बन्धित ऋणीले सम्पूर्ण कर्जा रकम २०८१ आषाढ महिना भित्रमा चुक्ता भुक्तान गरेमा जरिवाना तथा हर्जाना रकममा शत प्रतिशत छुट दिने भएको हो ।

‘बैंक पनि साथी पनि, राम्रो पनि हाम्रो पनि’ भन्ने मूल नाराका साथ उत्तरदायी बैंकिङको अभ्यास गर्दै आइरहेको एनआईसी एशिया बैंकले देशमा हाल कायम रहेको आर्थिक शिथिलताका कारण बैंकबाट कर्जा लिएका ग्राहकहरूमा परेको असरलाई न्यूनीकरण गर्न सघाउ पुर्याउने हेतुले यो योजना ल्याएको बताएको छ ।

०८० चैतसम्म भाखा नाघेका कर्जा ग्राहकहरूको हकमा जरिवाना तथा हर्जाना रकममा शत प्रतिशत छुट र साधारण बक्यौता ब्याज रकममा समेत छुट दिनेछ । बैंकले ल्याएको छुट योजना अनुसार भाखा नाघेको समयावधि ९१ दिनदेखि १८० दिन भएमा साधारण ब्याज रकममा छुट १५ प्रतिशत, १८१ दिनदेखि ३६५ दिन    २५ प्रतिशत तथा ३६५ दिनभन्दा बढी ३५ प्रतिशत छुट दिनेछ । 

यसैगरी मासिक तथा त्रैमासिक किस्ताबन्दीमा भुक्तानी हुने वा चालू पुँजी कर्जा तथा अन्य रिभल्विङ प्रकृतिका कर्जाहरू लगायत बैंकबाट प्रवाह भएका कुनै पनि प्रकारका कर्जाहरूमा आर्थिक शिथिलताका कारणले मर्कामा परेका ग्राहकहरूले यस योजनामा सहभागी भई लाभ लिन सक्ने बैंकले जनाएको छ ।

यस असाधारण समयमा राष्ट्रिय अर्थतन्त्रको वृहत्तर हितको निमित्त सबै सरोकारवालाहरूले आ–आफ्नो हिसाबले योगदान पुर्याउनुपर्ने आजको टड्कारो आवश्यकतालाई हरसम्भव सम्बोधन गर्न बैंकले ऋणीहरूका लागि कर्जामा आकर्षक ब्याज छुटको व्यवस्था गरेको सहायक प्रमुख कार्यकारी अधिकृत  एवं प्रमुख सूचना अधिकारी अर्जुनराज खनियाले बताए ।  

बैंकले ल्याएको यस छुट योजनाबाट आर्थिक शिथिलताले समस्यामा पर्नुभएका ग्राहकहरूको वित्तीय भार कम गर्न केही हदसम्म भए पनि मद्दत पुग्नुका साथै देशको समग्र अर्थतन्त्रको पुर्नउत्थान एवं दिगो सबलीकरणमा समेत टेवा पुग्ने बैंकले विश्वास लिएको खनियाको भनाइ छ ।