काठमाडौं महानगरको नगर सभामा चर्काचर्की, मेयर बालेनको कार्यप्रति जनप्रतिनिधि असन्तुष्ट

१० असार, काठमाडौं । भृकुटीमण्डपस्थित राष्ट्रिय सभागृहमा जारी काठमाडौँ महानगरपालिकाको १५ औँ अधिवेशनमा चर्काचर्की भएको छ । आर्थिक वर्ष २०८१/८२ को नीति तथा कार्यक्रममाथिको छलफलमा भाग लिने क्रममा मेयर शाहमाथि वडा अध्यक्षहरूले विभिन्न आरोप लगाएका छन् । नगर सभामा खास गरी दलका जनप्रतिनिधिले मेयर बालेन शाहप्रति असन्तुष्टि जनाएका हुन् ।

नगरको नीति तथा कार्यक्रममाथि छलफल गर्न बोलाएको अघिल्लो बैठकमा तीन दलका नेताहरूले संयुक्त रुपमा संशोधन हाल्न खोजेका थिए । तर, मेयर शाहले बैठक स्थगित गरी १६० जनप्रतिनिधिको बोल्ने अधिकार हनन भएको उनले फेसबुकबाट आरोप लगाए । यसैलाई लिएर जनप्रतिनिधिले असन्तुष्टि जनाउँदै यसको विरोध गरेका छन् । वडाध्यक्षहरु नविन मानन्धर, नवराज पराजुली र ईश्वरमान डंगोलले मेयर शाहको विरोध गरे । 

उनीहरुले आफूहरूले साझा रुपमा संशोधन प्रस्ताव तयार पारेको भन्दै मेयरप्रति असन्तुष्टि राख्दै  वडाध्यक्ष पराजुलीले आफूहरू दलको घोषणापत्र र चुनाव चिह्न लिएर जनतामाझ गएको र त्यसअनुसार साझा धारणा बनाउन एक घन्टा बैठक सारौं भन्दा मेयरले बैठक स्थगित नै गरेर स्टाटस लेखेको बताए । अन्तिम गाँसमा टुंगो लागेको जस्तो, नमिठो जस्तो । जुन खालको स्टाटस आयो, त्यसमा दुःख लाग्यो, उनले भने ।

वडा नम्बर १५ का वडाध्यक्ष ईश्वरमान डंगोलले फुटबल खेलमा जस्तै महानगरमा पनि टिम नै मिलेर काम गरे मात्रै सफल हुने बताए । फुटबल खेलको उदाहरण दिँदै सोमबार बसेको १५ औँ नगरसभाको तेस्रो बैठकमा वडाध्यक्ष डंगोलले अवसर ग्रहण गर्न सके मात्रै सफल हुनसक्ने बताए । 

उनले भने, ‘म फुटबल खेलाडी, सायद सबैलाई यो खेल रमाइलो लाग्छ होला । त्यसमा ११ जना खेलाडी हुन्छ । त्यसमा एकजना क्याप्टेन, एकजना गोलकिपर गरी, सेन्टरमा खेल्ने गरी ११ जना हुन्छ । त्यहाँ आ–आफ्नो रोल हुन्छ । सिस्टममा सबै मिल्यो भने गोल गर्न सक्छौँ । सबै मिल्यौँ भने हामीले गोल गर्न सक्छौँ । गोलकिपरले मात्रै बल जोगाउँछु भनेर सम्भव छ ? सिस्टमले अघि बढ्यो भने मात्रै हामी सफल हुन्छौँ ।’