कोशी सरकारविरुद्धको रिटमा सुनुवाइ सकिएन, मंगलबार रिट निवेदकका तर्फबाट जवाफी बहस हुने

१० असार, काठमाडौं । सुनुवाइ नसकिएका कारण कोशी प्रदेश सरकार विरुद्धको रिट हेर्दाहेर्दैमा राखिएको छ । सोमबार पनि सर्वोच्चका न्यायाधीश त्रय कुमार रेग्मी, नहकुल सुवेदी र अब्दुल अजीज मुसलमानको पूर्ण इजलासमा सुनुवाइ नसकिएर हेर्दाहेर्दैमा राखिएको हो । मंगलबार यसको बाँकी प्रक्रिया जारी रहने भएकाले फैसला आउने सम्भावना रहेको छ ।

तत्कालीन मुख्यमन्त्री केदार कार्कीका तर्फबाट दायर रिट कर्ता तर्फको बहस आइतबार नै सकिएको थियो । सोमबार प्रतिवादी कोसी सरकारका बहालवाला मुख्यमन्त्री हिक्मत कार्कीका तर्फबाट भएको बहस बाँकी छ । प्रतिपक्षीले धेरै जना वकिलको नाम लेखाएकाले बहस अझै लम्बिन सक्ने सम्भावना छ । 

मंगलबार मुख्यमन्त्रीका तर्फबाट एक जनाले मात्र बहस गर्ने अनि जवाफ दिने इजलासबाट निर्देशन भएको छ । सोमबार मुख्यमन्त्री कार्कीका तर्फबाट वरिष्ठ अधिवक्ताहरू टीकाराम भट्टराई, रमण श्रेष्ठ, रमेश बडाल, प्रकाश केसी ,अधिवक्ताहरू माधव बस्नेत, भीमार्जुन आचार्य, हर्कसिंह रावल लगायतले बहस गरेका थिए । भोलि अधिवक्ता एवं कोशी प्रदेश नेकपा एमालेका सचेतक रेवतीरमण भण्डारीले बहस गर्ने र त्यसपछि रिट निवेदकका तर्फबाट जवाफी बहस हुनेछ । 

कोशी प्रदेशमा संविधानको धारा १६८ (५) अनुसार मुख्यमन्त्री बनेका केदार कार्कीविरुद्ध प्रदेशसभामा अविश्वास प्रस्तावसमेत नराखी नयाँ मुख्यमन्त्री नियुक्त गरिएको थियो । एमालेका हिक्मतकुमार कार्कीलाई नियुक्त गरेपछि आफू मुख्यमन्त्री बहाल रहँदा रहँदै भएको नियुक्तिमाथि प्रश्न उठाउँदै कार्की  सर्वोच्च पुगेका थिए । 

उनले आफू विरुद्ध अविश्वासको प्रस्ताव नआएको, राजीनामा नदिएको र पदमुक्त हुने अन्य आधार पनि केही नभएको अवस्थामा नयाँ मुख्यमन्त्री नियुक्ति भएको दाबी गरेका छन् । उनले संविधान र संसदीय प्रक्रियामा प्रवेश नै नगरी सरकार बनाउने कुराले लोकतन्त्रलाई अराजकतातर्फ धकेल्ने भन्दै तत्काल अन्तरिम आदेशमार्फत प्रदेश प्रमुख परशुराम खापुङको निर्णय सच्याउन माग गरेका छन् ।