धितोपत्र बोर्डको अध्यक्षका लागि दुई जनाको मात्र नाम सिफारिस गर्न मिल्दैनः महान्यायाधिवक्ता कार्यालय

१ असार, काठमाडौं । महान्यायाधिवक्ता कार्यालयले नेपाल धितो पत्र बोर्डको अध्यक्ष नियुक्ति प्रक्रियामा तीन जनाकै नाम सिफारिस आवश्यक हुने राय दिएको छ । अर्थ मन्त्रालयका अनुसार बोर्डको अध्यक्ष नियुक्ति प्रक्रिया अगाडि बढाउन गठित सिफारिस समितिले मागेको सुझावमा महान्यायाधिवक्ता कार्यालयले तीन जना नै हुनुपर्ने जवाफ पठाएको हो । 

बोर्ड अध्यक्ष नियुक्ति प्रक्रिया अघि बढाउने बारे समितिले महान्यायाधिवक्ताको कार्यालयबाट राय सुझाव मागेको थियो । सोही अनुसार महान्यायाधिवक्ता कार्यालयले दुई जनाको नाम सिफारिस गर्न नमिल्ने र कम्तीमा पनि ३ जनाको नाम सिफारिस हुनुपर्ने जनाएको छ । नेपाल धितो पत्र बोर्डको अध्यक्षमा अन्तर्वार्तामा सहभागी भएका दुई जनालाई मात्रै सिफारिस गर्न नमिल्ने महान्यायाधिवक्ताको कार्यालयको राय हो । 

महान्यायाधिवक्ताको कार्यालयले पहिलो चरणमा छानिएका पाँचमध्ये तीन जनाको नाम सरकारलाई सिफारिस गर्नुपर्ने, यदि यो सम्भव नभए पुनः नयाँ प्रक्रिया सुरू गर्नुपर्ने सल्लाह दिएको छ । छनोट समितिले पहिलो चरणमा १९ जनाबाट सन्तोषनारायण श्रेष्ठ, धितो पत्र बोर्डका कार्यकारी निर्देशक द्वय मुक्तिनाथ श्रेष्ठ, डा. नवराज अधिकारी, नेपाल स्टक एक्सचेन्ज (नेप्से) का प्रमुख कार्यकारी अधिकृत कृष्ण बहादुर कार्की, नेपाल बीमा प्राधिकरणका पूर्व अध्यक्ष चिरञ्जीवी चापागाईंलाई छानेको थियो । 

यी पाँचमध्ये पहिलो पटक बोलाएको अन्तर्वार्तामा सन्तोष नारायण श्रेष्ठ र मुक्तिनाथ श्रेष्ठ मात्रै उपस्थित भए । धितो पत्र बोर्डका अध्यक्षको लागि बोलाइएको पहिलो पटकको अन्तर्वार्तामा जम्मा दुई जना उम्मेदवार मात्रै पुगेपछि बाँकी तीन जनालाई बोलाइएको थियो । दोस्रो पटक पनि यी तीनै जना उम्मेदवार अन्तर्वार्ताको लागि उपस्थित नभएपछि अर्थ मन्त्रालयले महान्यायाधिवक्ताको कार्यालयसँग सुझाव मागेको थियो ।