सीआईबी हुँ भन्दै २ करोड लुट्ने प्रहरीसहित ४ जना पक्राउ

११ असार, काठमाडौं । भक्तपुरको दधिकोटमा २ करोड नगद लुटेको आरोपमा प्रहरीले चार जना पक्राउ गरेको छ । उपत्यका अपराध अनुसन्धान कार्यालयको टोलीले सुजन रसाइली, भीम तामाङ, मुनाराज राई, कृष्णबहादुर बोहोरालाई पक्राउ गरेको हो । दधिकोटका डिल्ली राउतको घरमा ४ असारमा लुटपाट भएको थियो ।
 
लुटपाटमा संलग्नलाई सार्वजनिक गरिने क्रममा प्रहरी हवल्दार कृष्ण बहादुर बोहरा नेपाल प्रहरीको सशस्त्र प्रहरी दुई नम्बर गण महाराजगन्जमा कार्यरत रहेको बताइएको छ । पक्राउ परेकाहरूले असार ४ गते सो रकम लुटपाट गरेको उजुरीपछि प्रहरीले अनुसन्धान अघि बढाएको थियो । प्रहरीका अनुसार अभियुक्तहरू आफूहरू सीआईबी भएको भन्दै राउतको घरभित्र प्रवेश गरेका थिए ।

त्यसपछि घरका सदस्यहरूलाई डर त्रास देखाउँदै उनीहरुले दराजमा रहेको २ करोड रुपैयाँ लुटेर भागेका थिए । प्रहरीले उनीहरुलाई आजै पत्रकार सम्मेलन गरेर सार्वजनिक गरेको छ ।