एसईईको नतिजा बिहीबार बिहान सार्वजनिक गर्ने निर्णय

१२ असार, काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा बिहीबार बिहान सार्वजनिक गर्ने भएको छ । बुधबार नतिजा सार्वजनिक गर्न प्राविधिक कारणले नसकिएको बोर्डले जनाएको छ । परीक्षा बोर्ड बैठकले प्राविधिक तयारी नपुगेकाले भोलि मात्रै नतिजा सार्वजनिक गर्ने निर्णय गरेको हो । 

नतिजा सार्वजनिक बारे छलफल गर्न बिहीबार बिहान ७ बजे बोर्ड बैठक बोलाइएको छ । १५ चैत्रदेखि २७ चैतसम्म भएको एसईई परीक्षामा देशभरका ५ लाख ४ हजार ४१४ विद्यार्थी सहभागी थिए । बोर्डले यस वर्षदेखि लेटर ग्रेडिङ निर्देशिका, २०७८ अनुसार नतिजा सार्वजनिक गर्नेछ । जसमा सैद्धान्तिक र आन्तरिकको मूल्याङ्कन फरक–फरक रूपमा गर्ने व्यवस्था छ ।

विद्यार्थीले सैद्धान्तिक तर्फ हरेक विषयमा न्यूनतम् ३५ प्रतिशत अंक ल्याउनुपर्छ । ७५ अंकको सैद्धान्तिक परीक्षा हुने विषयमा न्यूनतम २६.२५ अंक ल्याउनुपर्छ । त्यसमा आन्तरिक तर्फ २५ पूर्णाङ्कको परीक्षामा भने ४० प्रतिशत अर्थात् १० अंक ल्याउनुपर्छ ।