तीन चरणमा गरी ७७ वटै जिल्लामा राष्ट्रिय परिचयपत्र पुर्याइने, साउन १ देखि २८ जिल्ला अनिर्वाय

१४ असार, काठमाडौं । सरकारले तीन चरणमा गरेर ७७ वटै जिल्लामा राष्ट्रिय परिचयपत्र लागु गर्ने भएको छ । पहिलो चरणमा २८ जिल्ला छानिएका छन् । यी जिल्लामा सामाजिक सुरक्षा भत्ता, पेन्सन र बीमाका लागि २०८१ साउन १ देखि राष्ट्रिय परिचयपत्र अनिवार्य गरिएको छ । 

गत सोमबार राजपत्रमा सूचना प्रकाशित गर्दै सरकारले पहिलो चरणमा २८ जिल्लामा लागू गर्ने निर्णय गरेको छ । अहिले यी जिल्लामा धमाधम वितरणको काम भइरहेको छ । राष्ट्रिय परिचयपत्र नभइ सामाजिक सुरक्षा भत्ता र पेन्सन जस्ता मासिक खर्च लिन नपाइने भएपछि वृद्धवृद्धाहरु समस्यामा पर्ने देखिएको छ । 

गत जेठ २४ गते बसेको को मन्त्रिपरिषद् बैठकले ७७ जिल्लामै परिचयपत्र लागू गर्ने निर्णय गरे अनुसार दोस्रो चरणमा आगामी माघ १ मा ३८ जिल्लामा र तेस्रो चरणमा २०८२ साउनदेखि ११ जिल्लामा लागू गरिनेछ । पहिलो चरणमा झापा, मोरङ, सुनसरी, उदयपुर, सप्तरी, सिरहा, सिन्धुली, धनुषा, महोत्तरी, सर्लाही, काठमाडौं, ललितपुर, भक्तपुर, मकवानपुर, रौतहट, बारा, पर्सा, चितवन, कास्की, तनहुँ, रूपन्देही, कपिलवस्तु, दाङ, सुर्खेत, बाँके, बर्दिया, कैलाली र कञ्चनपुर जिल्ला परेका छन् ।

राष्ट्रिय परिचयपत्र सकेसम्म सुगम र सहज रूपमा परिचयपत्र लिन सक्ने जिल्लामा पहिलो चरणमा लागू गरिएको हो । राजस्वसम्बन्धी व्यक्तिगत आयकर दर्ता, सवारी चालक अनुमतिपत्रसम्बन्धी र कम्पनी दर्ता एवं नवीकरणका लागि पनि आगामी साउनदेखि देशभर नै परिचयपत्र अनिवार्य गरिएको छ । बैंकिङ तथा वित्तीय सेवा, टेलिफोन तथा सिमकार्ड, सामाजिक सुरक्षा कोष तथा घरजग्गा किनबेचमा भने आगामी माघ १ देखि परिचयपत्र अनिवार्य गरिएको छ ।