फरार अभियुक्त झालाई पक्राउपछि अस्पताल लगियो

१५ असार, काठमाडौं । नक्कली भुटानी शरणार्थी प्रकरणका फरार अभियुक्त बेचन झा पक्राउ परेका छन् । उनलाई गएराति कञ्चनपुरबाट पक्राउ गरिएको हो । स्वास्थ्यमा समस्या देखिएको भन्दै उनलाई अहिले उपचारका लागि अस्पतालमा लगिएको  प्रहरीले जनाएको छ । 

झालाई नेपाल भारत सीमा क्षेत्रबाट पक्राउ गरिएको प्रहरीले जनाएको छ । यही प्रकरणमा शुक्रबार नै पूर्वगृहमन्त्री बादल थापाका छोरा प्रतीक थापा पक्राउ परेका थिए । यसअघि प्रहरीले झाको वतनको पूरा विवरण नखुलेको भन्दै खुलेका बखत पुनः अनुसन्धान गर्ने गरी अनुसन्धान प्रतिवेदन जिल्ला सरकारी वकिल कार्यालयमा बुझाएको थियो ।

एकजना पीडितले झालाई २ करोडको चेक दिएको खुलेको थियो । आफू पक्राउ परेपछि टोखा नगरपालिका–६ धापासीका रामशरण केसीले झालाई २ करोडको चेक दिएको बयान दिएका थिए । झाले भुटानी शरणार्थी सम्बन्धी मन्त्रिपरिषदबाट निर्णय गराउने भन्दै रकम असुल गरेका थिए । 

भुटानी शरणार्थी प्रकरणमा प्रहरीले अनुसन्धान जारी नै रहेको जनाएको छ । पहिलो चरणको अनुसन्धान सकेर मुद्दा अदालती प्रक्रियामा रहेकै बेला सोही प्रकृतिको थप जाहेरी प्रहरीमा परेको थियो । सोही जाहेरीमाथि प्रहरीले थप अनुसन्धान जारी राखेको हो । शरणार्थी बनाएर अमेरिका पठाउने धन्दामा लागेका केही आरोपी अझै पक्राउ गर्न बाँकी छ ।