प्रेस युनियनले ताला लगाएपछि कार्यालय छोडेर भाग्यो पत्रकार महासंघको निर्वाचन समिति

१५ असार, काठमाडौं । नेपाल पत्रकार महासंघले सदस्यता विवाद नसुल्झाई निर्वाचन प्रक्रिया अगाडि बढाएपछि नेपाल प्रेस युनियन आन्दोलनमा उत्रिएको छ । शनिवार बिहानैदेखि प्रेस युनियनले पत्रकार महासंघमा धर्ना दिएको छ । कार्यतालिका अनुसार आज शनिवार उम्मेदवारहरूको मनोनयन दर्ताको समय थियो । तर, गए रातीदेखि नै निर्वाचन समिति महासंघमा रहेको कार्यालय छोडेर भागेको छ । 

विधान विपरीत जारी विधि र प्रक्रिया मिच्दै क्रियाशील पत्रकार हटाएको र गैर पत्रकारलाई मतदाता नामावलीमा समावेश गरेको भन्दै नेपाल प्रेस युनियनले महासंघको केन्द्रीय कार्यालयमा तालाबन्दी गरेको हो । महासंघको सदस्यता विवाद वैधानिक ढंगले टुंगो नलगाई जबर्जस्ती ढंगबाट निर्वाचन प्रक्रिया अघि बढाएको प्रेस युनियनको दावी छ ।  

महासंघमा युनियनले ताला लगाएपछि शनिवार बिहान महासंघका तर्फबाट अनलाइनबाटै उम्मेदवारी दर्ता हुने विज्ञप्ति आएको थियो । तर, निर्वाचन समितिले भने यो निर्णय आफूहरूको नभएको र अब के गर्ने भन्ने छलफल भइरहेको जानकारी दिएको छ । अहिले महासंघका केही पदाधिकारी विभिन्न होटलमा लुकेर बसेको बताइएको छ ।  

नेपाल पत्रकार महासंघले जिल्ला शाखा, प्रदेश शाखा र प्रतिष्ठान शाखाले पठाएको सिफारिसलाई हटाएर कुनै संरचनाले सिफारिस नगरेका गैर पत्रकारहरूलाई महासंघको निर्वाचन प्रक्रियाको मतदाता नामावलीमा समावेश गरिएको हुनाले तालाबन्दी गर्नु परेको प्रेस युनियनको भनाई छ । युनियनले यस घटनाप्रति आपत्ति जनाउँदै महासंघको केन्द्रीय नेतृत्वको जवरजस्ती कब्जाको नीति कायम राखेसम्म देशभर तालाबन्दी र आन्दोलन कायमै रहने बताएको छ । 

महासंघका जिल्ला, प्रदेश र प्रतिष्ठानले पठाएका सिफारिसलाई कायम गर्न आग्रह गर्दै सदस्यता विवाद नटुंगिएसम्म महासंघको निर्वाचनमा भाग नलिई देशभर आन्दोलन गर्ने समेत युनियनका महासचिव पौडेलले चेतावनी  दिए । ‘पत्रकार महासंघलाई फेरि पनि महासंघका जिल्ला, प्रदेश र प्रतिष्ठानले पठाएका सिफारिसलाई कायम गर्न आग्रह छ ।