लोकतन्त्रको आधारशीला मान्नुपर्ने संसदको आधारभूत चरित्र नै पारदर्शी भएन

१६ असार, काठमाडौं । नेपालमा संसदीय इतिहासले ६६ वर्ष बिताएको छ । असार १६ गते नेपालमा संसद दिवस मनाइँदै आएको छ । हरेक वर्ष संसदको पहिलो बैठक बसेको दिनको सम्झनामा संसद दिवस मनाउने गरिन्छ । तर, यो दिवस औपचारिकतामा मात्रै सीमित छ । 

संसद सचिवालयले आज खासै कार्यक्रम राखेको छैन । संसदसँग सम्बन्ध राख्ने केही संघसंस्थाले भने औपचारिक कार्यक्रम राखेर संसद् दिवस मनाउँदै छन् । नेपालले २०१६ साल असार १६ गते संसदको पहिलो बैठक बसेको सम्झनामा यो दिवस मनाउँदै आएको छ । संसद् स्थापनाको स्मरण गर्दै आज संघीय संसद् र परामर्शदाता संस्था पूर्वसांसद मञ्चले विविध कार्यक्रम आयोजना भएका छन् ।

लोकतन्त्रमा जन बोली र जनताका समस्या बोल्नुपर्ने ठाउँ हो संसद । कम्तीमा वर्षको एक दिन भएपनि संसदका कमीकमजोरीमा बहस हुनुपर्ने, पुराना नीतिको समीक्षा भएर नयाँ नीति बन्नुपर्ने, संसद र सरकार बीचका अमिल्दा विषयहरूमा सुधारका लागि विवेचना हुनुपर्ने हो । कम्तीमा सांसदको भूमिकामै बहस भएपनि चरित्र सुधारका लागि सहयोग बन्न सक्थ्यो । तर, शुभकामना भन्दा माथि उठेर संसद दिवसलाई सान्दर्भिक बनाउने काम विगतदेखि नै भएका छैनन् । 

यस दिवसको अवसरमा प्रतिनिधि सभाका सभामुख देवराज घिमिरे र राष्ट्रिय सभाका अध्यक्ष नारायण दाहालले शुभकामना दिँदै संसदलाई जनमुखी बनाउन आजको दिनले प्रेरणा दिने बताएका छन् । लोकतन्त्रको मन्दिरका रुपमा परिचित संसदको आधारभूत चरित्रप्रति सबै सजग र सचेत रहनु पर्ने उनीहरुले बताएका छन् ।

पहिलो संसदले २०१६ असार १९ गते नेपाली कांग्रेसका नेता कृष्णप्रसाद भट्टराईलाई सभामुखमा निर्वाचित गरेको थियो । उनी २०१७ साल पुस १ गतेसम्म सभामुखको भूमिकामा क्रियाशील थिए । २०१७ साल पुस १ गते तत्कालीन राजा महेन्द्रले दलविहीन पञ्चायती व्यवस्था घोषणा गरेपछि जननिर्वाचित संसद भंग भएको थियो ।

देशको संसदीय इतिहास अन्य मुलुकको तुलनामा नयाँ होइन । पहिलो संसदको निर्वाचन भएको छ दशकभन्दा बढी भएको छ । बलियो संसद् लोकतन्त्रको आधारशिला भएको बताउँदै राजनीतिक विश्लेषकहरूले संसदलाई लोकतन्त्रको मन्दिरका रूपमा लिनुपर्ने बताएका छन् । उनीहरूका अनुसार लोकतान्त्रिक संसदको आधारभूत चरित्र भनेको पारदर्शी, जन उत्तरदायी र समावेशी आवाजलाई प्रतिनिधित्व गर्ने हो ।