रास्वपा महामन्त्री ढकालको माग, आफूमाथि कारवाही गर्न डाकिएको केन्द्रीय समिति बैठक लाइभ हुनुपर्छ

१६ असार, काठमाडौं । जिल्ला घुमेर पार्टीको वास्तविक अवस्था चित्रण गरेर प्रतिवेदन बनाएपछि पार्टीभित्र तारो बनेका राष्ट्रिय स्वतन्त्र पार्टी (रास्वपा) महामन्त्री डा. मुकुल ढकालले अब बस्ने केन्द्रीय समितिको बैठक लाइभ हुनुपर्ने माग राखेका छन् । उनले सभापति रवि लामिछानेसँग बैठक लाइभ हुनुपर्ने माग राखेका हुन् । 

आउँदो बुधबार रास्वपाको केन्द्रीय कमिटी बैठक बोलाइएको छ । यो बैठकमा महामन्त्री ढकालमाथि कस्तो कारवाही हुने भन्ने विषयमा छलफल हुने भएकाले उनले प्रत्यक्ष प्रसारण गर्न माग गरेका हुन् । उनले पार्टीको अवस्था राम्रो नभएको र यही अनुसार अगाडि गएमा विवेकशील साझा पार्टीको भन्दा पनि नाजुक अवस्थामा पुगिने प्रतिवेदन बनाएर बुझाएका थिए । 

त्यसयता रास्वपाले उनीमाथि कारवाहीको तयारी गरेको छ । अनुशासन समितिले उनीसँग स्पष्टीकरण समेत सोधेको छ । महामन्त्री ढकालले गत बुधबार पार्टी सभापति रवि लामिछानेलाई समीक्षा प्रतिवेदन बुझाएका थिए । त्यो प्रतिवेदन पार्टीले बुझेपछि एकथरी नेता उनलाई तत्काल कारवाही गर्नुपर्ने पक्षमा देखिएका छन् । इलाम–२ को उपचुनावमा हार व्यहोरेपछि महामन्त्री ढकालले समीक्षा यात्रामा निस्किएका थिए । सोही अनुसार उनले प्रतिवेदन बनाएका थिए ।  
 
उनले ३९ जिल्ला घुमेर बनाएको प्रतिवेदनमा पार्टी संकट अवस्थामा पुगेको र यस्तै रहे राष्ट्रिय पार्टी बन्न नसक्ने निष्कर्ष निकालेका छन् । यसपछि महामन्त्री ढकाललाई रास्वपा अनुशासन समितिले गत शुक्रबार स्पष्टीकरण सोधेको थियो । महामन्त्री ढकालले पार्टीको अनुशासनविपरीत समीक्षा यात्राको प्रतिवेदनका विषय सार्वजनिक गरेको भन्दै आयोगले स्पष्टीकरण सोधेको हो ।