सहकारी ठगी प्रकरण: अध्ययनका लागि २० वटा सहकारीका अत्यावश्यक कागजात मगाइने

१६ असार, काठमाडौं । सहकारी ठगी प्रकरणको छानबिनका लागि गठित संसदीय विशेष समितिले समस्याग्रस्त पहिचान भएका २० वटा सहकारी संस्थाका अत्यावश्यक कागजात माग गर्ने भएको छ । सिंहदरबारमा आइतबार बसेको समिति बैठकले कागजात मगाउने निर्णय गरेको हो । 

कार्यादेशसहितको अनुसूची १ मा रहेको २० वटा समस्याग्रस्त सहकारीको बचत परिचालनको स्थिति, लेखा परीक्षण प्रतिवेदन लगायतका विवरण पठाउनका लागि पत्राचार गर्ने निर्णय गरेको समितिले जनाएको छ । उक्त सहकारीको सबै विवरण मगाएर त्यसमाथि अध्ययन र अनुसन्धान गरी कारवाहीको प्रक्रिया अगाडि बढाइनेछ । 

समितिले समस्याग्रस्त सहकारीको छानबिनका लागि यसअघि भएका अनुभवका बारेमा विभिन्न आयोग, समितिका संयोजकहरुसँग छलफल गरेको छ । समितिले २०४७ सालमा सहकारी सन्दर्भमा अन्तरिम सरकारले गठन गरेको कार्यदलका संयोजक राधाकृष्ण मैनाली, तत्कालीन समस्याग्रस्त सहकारी सम्बन्धमा जाँचबुझ आयोगका अध्यक्ष गौरी बहादुर कार्की लगायतसँग यसअघिका अध्ययन अनुसन्धानका बारेमा छलफल गरेको हो । 

पुराना अनुभवका आधारमा समितिले वस्तुनिष्ठ अध्ययन गरि निचोडमा पुग्ने बताए । गत जेठ १५ गते सहकारीको बचत रकम अपचलनसम्बन्धी छानबिन गर्न संसदीय छानबिन समिति गठन भएको थियो । गोर्खा मिडियासँग सम्बन्धित सहकारीको कागजात मगाउने निर्णय यसअघि नै भएको थियो ।