एमालेका मन्त्री र सांसदलाई हाइअलर्ट रहन ओलीको निर्देशन, सत्ता समीकरण फेरिँदै

१७ असार, काठमाडौं । नेकपा एमालेका अध्यक्ष केपी शर्मा ओलीले हालको सत्ता समीकरण परिवर्तन हुने संकेत दिएको छन् । एमाले उच्चस्रोतका अनुसार अध्यक्ष ओलीले एमालेका तर्फबाट सरकारमा गएका मन्त्री र सांसदहरूलाई उपत्यका नछोड्न निर्देशन दिएका छन् । प्रधानमन्त्री प्रचण्डलाई भेटेपछि ओलीले यस्तो निर्देशन दिएका हुन् । 

सरकारमा गएका एमाले मन्त्रीहरूलाई कुनै पनि बेला सरकारबाट बाहिरिनुपर्ने अवस्था आउन सक्छ, त्यसैले तपाईहरु हाइअलर्टमा बस्नु होला, ओलीको निर्देशन सुनाउँदै एमाले उच्च स्रोतले नेपालबहससँग भन्यो,‘अब सत्ता समीकरण परिवर्तन हुने भयो । पहिले कांग्रेसबाट प्रधानमन्त्री बन्छ होला ।’ ओलीले नेपाली कांग्रेसका सभापति शेरबहादुर देउवालाई बालकोट निवासमा बोलाएपछि सत्ता समीकरण फेरबदल हुने चर्चा सुरु भएको थियो । 

उक्त स्रोतले भन्यो, ‘समीकरण फेरिएपछि पहिले नेपाली कांग्रेसले नेतृत्व गर्ने र त्यसपछि एमालेले आम चुनाव गराउने गरी सरकारको नेतृत्वमा जाने मोटामोटी सहमति छ । तर, यसै भनिहाल्ने अवस्था छैन । नेताहरु छलफलमा जुटिसकेका छन् । भोलिसम्ममा केही रिजल्ट आउला ।’