भेटघाटले अर्कै संकेत दिएपछि सत्ता समीकरणको बचाउमा लाग्यो प्रधानमन्त्रीको सचिवालय

१७ असार, काठमाडौं । शनिबार साँझ नेकपा एमालेका अध्यक्ष केपी शर्मा ओलीले नेपाली कांग्रेसका सभापति शेरबहादुर देउवालाई बालकोटमै बोलाएर लामो छलफल गरेपछि तरंगित बनेको नेपाली राजनीतिले भोलिका दिनमा कुन मोड लिन्छ भन्ने कुरा गर्भमै छ । आइतबार ओली र प्रधानमन्त्रीसमेत रहेका नेकपा माओवादीका अध्यक्ष पुष्पकमल दाहाल प्रचण्डबीच भएको गोप्य छलफलले राजनीतिमा केही हुन लागेको हो कि भन्ने थप आशंका बढाएको छ । 

सोमबार प्रधानमन्त्री प्रचण्ड र अध्यक्ष ओलीबीच बालुवाटारमा बिहान ९ देखि मध्याह्न १२ः३० बजेसम्म छलफल भएपछि यो छलफलका विषयमा प्रष्टीकरण दिन प्रधानमन्त्रीको सचिवालयको टोली नै सञ्चार माध्यममा उत्रनुपरेको छ । बालकोटमा के विषयमा छलफल भयो, आइतबार ओली र प्रचण्डले के विषयमा छलफल गरे र आज सोमबार साढे तीन घण्टा प्रधानमन्त्री प्रचण्ड र अध्यक्ष ओलीबीच के कुरा चल्यो भन्ने कुरा यी तीन नेतामै सीमित छ । यो छलफलले बाहिर आएको भनेको टीआरसी विधेयकलाई निष्कर्षमा पुर्याउन कार्यदल गठन ।   

यो बाहेक यी तीन नेता बीचको भेटघाटको अन्तर्य खुलेको छैन । राजनीतिक समीक्षा भने सत्ता समीकरण परिवर्तन हुने कुरामै छ । यसमा पनि पहिलो प्रधानमन्त्री कांग्रेस कि एमाले भन्नेमै छ । प्रधानमन्त्रीसँग भेटेर अध्यक्ष ओलीले एमालेका तर्फबाट सरकारमा गएका मन्त्री र सांसदहरूलाई उपत्यका नछोड्न निर्देशन दिएको भनिएको छ । प्रधानमन्त्री प्रचण्डलाई भेटेपछि ओलीले यस्तो निर्देशन दिएकाले सत्ता समीकरण परिवर्तन हुने सम्भावना बढेको छ ।  

तीन नेताको बाक्लो भेटघाटले समीकरण फेरिने हल्ला चल्न थाले पनि त्यसको बचाउमा प्रधानमन्त्रीको सचिवालय लागेको देखिन्छ । सोमबार प्रधानमन्त्री र ओलीबीच भएको छलफलको प्रतिक्रियामा समीकरण तलमाथि नहुने भन्नेमा केन्द्रित देखिन्छ । सचिवालयका तीन सदस्यको एकैपटक प्रतिक्रिया आएकाले पनि बचाउमा लागेको देखियो । 

प्रधानमन्त्री र ओली बीचको भेटलाई सरकारका काम–कारबाहीलाई अझ सशक्त बनाउने विषयमा भएको प्रधानमन्त्रीका प्रेस सल्लाहकार गोविन्द आचार्यको बुझाइ छ । उहाँहरूबीच सरकार सञ्चालन र समसामयिक विभिन्न विषयमा छलफल भयो । अझै प्रभावकारी ढंगले काम गर्ने, यो सत्ता समीकरण मिसन ०८४ सम्म लैजाने उद्देश्यले भएको हो, त्यसैले अझै बलियो बनाएर लैजाने कुरा भएको आचार्यले एउटा सञ्चारमाध्यामलाई प्रतिक्रिया दिएका छन् । यो कुरा उनले बाह्रखरीलाई बताएका हुन् ।  
 
हल्ला त केहीको एजेन्डा हो । सरकार कमजोर धरातलमा बनेको होइन, कोही आएर केही दिन्छु भनेर भत्किने । त्यो अवस्था हिजो पनि थिएन र आज पनि छैन । यसमा दुई नेताबीच कुनै आशंका नै छैन । बाहिर आशंका भएको हो, आचार्यले भनेका छन् । 

प्रधानमन्त्रीका अर्का सल्लाहकार रमेश मल्लले भेटमा दुई शीर्ष नेताहरूले नयाँ गठबन्धनका बारेमा कुनै सम्भावना नरहेको निष्कर्ष निकाले प्रतिक्रिया दिएका छन् । छलफलपछि प्रचण्ड–ओलीको भेटको निष्कर्ष सुनाउँदै मल्लले भनेका छन् ‘हामीहरूबीच केही कन्फ्युजन छैन । कांग्रेस–एमाले मिलेर सरकार बनाउने भन्ने विषय बजार हल्ला मात्रै हुन् । हामी सरकारको काम र साझेदार दलहरुबीचको सम्बन्ध सुदृढ बनाउने बारे छलफल गरिरहेका छौं । बाहिर अर्को हल्ला छ । मल्लले नेपाल प्रेससँग गरेको कुरा हो यो । 

यतिमात्र हैन, प्रधानमन्त्रीकी छोरीसमेत रहेकी गंगा दाहालले त अनलाइन खबरमा अन्तर्वार्ता नै दिएकी छन् । ‘उहाँहरू दुई महत्वपूर्ण दलको महत्वपूर्ण नेता भेट्नु पनि कुनै अनौठो मान्नुपर्ने विषय होइन । संवाद पनि भइराख्नु पर्छ । तर पछिल्लो समय दुई नेताको बीचमा संवाद नै हुन नसकेको हो कि जस्तो भइरहेको थियो । कतिले त बोलचालै छैन जस्तो पनि ठाने होलान् । त्यसैले भक्तपुर गएका बेला अध्यक्ष ओलीको घरमा भेट भएको हो । यसमा अन्यथा केही छैन ।’ उनले भनेकी छन् ।  

यसरी प्रधानमन्त्रीको सचिवालयबाट जति सक्दो चाँडो सत्ता समीकरणलाई बचाउ गर्न हतार गर्नुपर्ने खालका कुरा यो भन्दा अगाडि आएका थिएनन् । भित्र जे छलफल भएपनि यी भेटघाट नेकपा एमाले कांग्रेससँग मिलेर सरकार बनाउने भन्दै बाहिर चलेको हल्ला निराधार भएको कुरा असत्य हो भन्न प्रधानमन्त्रीले सचिवालयले भन्न खोजेको प्रष्टै भयो ।  

तर, सचिवालयको प्रयास सफल नहुने देखिएको छ । एमाले अध्यक्ष ओलीले आफ्ना मन्त्रीहरूलाई हाइअलर्ट रहन निर्देशन दिनु र सांसदलाई उपत्यका नछोड भन्नुले केही हुन्छ भन्ने संकेत गरेको छ । ओलीले देउवासँग छलफल गरेपछि सत्ता समीकरणमा हलचल मच्चिएको हो । कांग्रेस सभापति देउवाले आजै पार्टीको पदाधिकारी बैठकमा छलफल पनि गरिरहेकै छन् । ओली र देउवाको भेटपछि कांग्रेस र एमाले मिलेर सरकार बनाउने बारे गृहकार्य अघि बढेको आँकलन छ । त्यसो त प्रचण्ड पनि कांग्रेससँग निरन्तर संवादमा रहेको बताइन्छ । जे भएपनि सत्ता समीकरण धरमरमा छ भन्ने यो संकेत हो ।