मन्त्रिपरिषद बैठकमा एमालेका दुई मन्त्री मात्र सहभागी, उच्च तहका नेतालाई ओलीले बोलाए बालकोट

१७ असार, काठमाडौं । सत्ता समीकरण परिवर्तन हुने हल्ला चलेपछि सोमबार बसेको मन्त्रिपरिषद बैठकमा एमालेका दुई जना मन्त्री मात्र सहभागी भएका छन् । उच्च स्रोतका अनुसार रक्षा मन्त्री हरिप्रसाद उप्रेती र कृषिमन्त्री ज्वालाकुमारी साह मात्र उपस्थित रहेका छन् । अरु एमालेका मन्त्रीहरू उपत्यकामै भएर पनि मन्त्रिपरिषदको बैठकमा सहभागी नभएका हुन् ।   

एमाले अध्यक्ष केपी शर्मा ओलीले पार्टीको पदाधिकारी तहका उच्च नेतालाई भने बालकोट बोलाएको स्रोतले जानकारी दिएको छ । उनले पदाधिकारी तहका उच्च नेतालाई आकस्मिक छलफलका लागि बालकोट बोलाएका हुन् । राजनीतिक परिवर्तनका विषयमा केहीबेरमै ओलीले पार्टीका उच्च तहका नेतासँग छलफल गर्न लागेका हुन् ।  

उता, नेपाली कांग्रेसको पदाधिकारी बैठक पनि बसिरहेको छ । देउवा निवास बुढानीलकण्ठमा बसेको बैठकमा देउवाले एमाले अध्यक्षसँग भएको भेटबारे पार्टी नेताहरूलाई ब्रिफिङ गरेका छन् । पार्टी पदाधिकारी र पूर्व पदाधिकारीहरुको बैठकमा देउवाले १५ असारमा एमाले अध्यक्ष केपी शर्मा ओलीसँग भएको भेटबारे जानकारी गराएका हुन् ।