बालकोटमा एमालेका मन्त्रीहरुसँग ओलीले राखे छलफल

१७ असार, काठमाडौं । शनिबार साँझदेखि तात्न थालेको नेपाली राजनीति सोमबारसम्म आइपुग्दा गरमागरम हुन थालेको छ । नेपाली कांग्रेस र नेकपा एमालेबाट आएका फरक गन्धले सत्ता समीकरणमा उथलपुथल हुने संकेत दिइरहेको छ । कांग्रेस र एमालेले पदाधिकारी तहमा पनि सत्ता समीकरणबारे छलफल चलाएका छन् ।  

यसैबीच नेकपा एमालेका अध्यक्ष केपी शर्मा ओलीले पार्टीबाट सरकारमा गएका मन्त्रीहरूलाई बालकोट बोलाएका छन् । सत्ता परिवर्तनको चर्चा चलिरहेका बेला एमाले अध्यक्ष ओलीले सोमबार साँझ ६ बजे मन्त्रीहरूलाई निवासमा बोलाएको एमाले उच्च स्रोतले जानकारी दिएको छ । सिंहदरबारको मन्त्रिपरिषद् बैठकमा पनि एमालेका सबै मन्त्री उपस्थित भएका छैनन् ।