ओलीको सचिवालयले भन्यो- मन्त्रीहरुलाई बालकोट बोलाएको खबर सत्य होइन

१७ असार, काठमाडौं । नेकपा एमालेका अध्यक्ष केपी शर्मा ओलीको सचिवालयले आफ्ना मन्त्रीहरूलाई बालकोट बोलाएको खबरको खण्डन गरेको छ । ओलीको सचिवालयले मन्त्रीहरूलाई अध्यक्ष ओलीले अहिले छलफलका लागि बोलाउनु भएको खबर सत्य नभएको जानकारी गराएको छ । 

यसअघि अध्यक्ष ओलीले एमालेका मन्त्रीहरूलाई छलफलका लागि बालकोट बोलाएको बताइएको थियो । ओलीको सचिवालयले भनेको छ- 'नेकपा एमालेका अध्यक्ष केपी शर्मा ओलीले सरकारमा सहभागी मन्त्रीहरूलाई अहिले साँझ छलफलमा बोलाएको भन्ने विभिन्न सञ्चार माध्यममा खबर आइरहेको छ। तर मन्त्रीहरूलाई अध्यक्ष ओलीले अहिले छलफलका लागि बोलाउनु भएको खबर सत्य नभएको जानकारी गराइन्छ ।'

एमालेबाट सरकारमा रघुवीर महासेठ, पदम गिरी, हरि उप्रेती, भगवती चौधरी, राजेन्द्र राई, दामोदर भण्डारी, ज्वालाकुमारी साह र बलराम अधिकारी रहेका छन् । शनिबार कांग्रेस सभापति शेरबहादुर देउवाले एमाले अध्यक्ष केपी शर्मा ओलीसँग भेट गरेपछि तरंगित भएको राजनीतिक वृत्तमा कांग्रेस- एमालेको सरकार बन्ने चर्चा चलिरहेको छ ।