राष्ट्रिय सहमतिको सरकारबारे छलफल गर्न कांग्रेसले बोलायो राप्रपासहितका साना दल

१८ असार, काठमाडौं । नेकपा एमालेसँगको समझदारीपछि राष्ट्रिय सहमतिको सरकार बनाउने निर्णय गरेको नेपाली कांग्रेसले राष्ट्रिय प्रजातन्त्र पार्टी लगायतका साना दलसँग मंगलबार छलफल गर्ने भएको छ । सभापति शेरबहादुर देउवा निवासमा बिहान बसेको पदाधिकारी बैठकले साना दलसँग छलफल गर्ने निर्णय गरेको हो ।  

मंगलबार साँझ कांग्रेस सभापति शेरबहादुर देउवाको निवास बूढानीलकण्ठमा राप्रपा, जनमोर्चा, लोसपा, जसपा लगायतका दललाई छलफलका लागि बोलाउने निर्णय भएको छ । देउवाले एमाले र कांग्रेसबीचको समझदारीअनुसार बन्ने सरकारको नेतृत्व आलोपालो हुने जानकारी दिनेछन्  ।

राजनीतिक स्थायित्व, आर्थिक स्थिति सुधार र संविधान संशोधनमार्फत वर्तमान राजनीतिक व्यवस्थाको रक्षाका लागि एमालेसँग सहमति गरिएको र राष्ट्रिय सरकारमा सहभागी हुन देउवाले साना दललाई आग्रह गर्ने बताइएको छ ।  बैठकमा संविधानको धारा ७६ को उपधारा (२) अनुसार नयाँ सरकार बन्ने, नभए संविधान अनुसार प्रकृया अघि बढ्ने निर्णय भएको छ । 

लोकतन्त्र र संविधान नै खतरामा परेको अवस्थामा प्रथम र दोस्रो दल एक ठाउँमा आउनुपर्ने राष्ट्रिय आवश्यकता बनेको र यसमा साना दलको साथ खोज्न कांग्रेसले छलफलका लागि बोलाएको हो । पार्टी कार्यसम्पादन समितिको बैठक भोलि ९ बजे बोलाइएको छ ।