कांग्रेस-एमाले गठबन्धनको पक्षमा उभिए राप्रपा र लोसपा

१८ असार, काठमाडौं । राष्ट्रिय प्रजातन्त्र पार्टी (राप्रपा) र लोकतान्त्रिक समाजवादी पार्टी (लोसपा) संविधान संशोधन गर्ने सहमतिका साथ बनेको कांग्रेस र एमाले गठबन्धनको पक्षमा उभिएका छन् । राप्रपाको पदाधिकारी बैठकले संविधान संशोधन गर्ने दुई दलबीच भएको सहमति सकारात्मक भएको जनाएको छ । 

राप्रपाले सरकारमा सहभागिताको विषय परिस्थितिअनुसार निर्णय हुने जानकारी दिएको छ । संविधान संशोधन गर्ने कांग्रेस–एमाले गठबन्धनको प्रस्ताव राप्रपाले स्वागत गरेको हो । सरकार गठनको प्रक्रिया प्रारम्भ नभइसकेकाले त्यसबारे निर्णय नभएको राप्रपाको भनाइ छ । 
 
यस्तै लोकतान्त्रिक समाजवादी पार्टी (लोसपा) ले पनि कांग्रेस–एमाले गठबन्धनको स्वागत गरेको छ । लोसपाका महामन्त्री डा. सुरेन्द्र झाले मधेस आन्दोलनले उठाएर थाती बसेको संविधान संशोधनको मुद्दा लिएर गठबन्धन बनेका कारण लोसपाले यसलाई स्वागत गरेको बताए । 

उनले सानो पार्टी भएर पनि निरन्तर प्रधानमन्त्री पदमा बस्दा प्रचण्डले हैसियत भुलेर दम्भ देखाएका कारण पनि अहिलेको गठबन्धन आवश्यक भएको बताए । ३२ सिट भएर पनि सरकारको नेतृत्व पाउँदा प्रचण्डमा जुन प्रकारको दम्भ देखिएको थियो र जुन ढंगले संसद्लाई बन्धक बनाउने काम भएको थियो त्यसबाट मुक्ति पाउन आवश्यक भइसकेको थियो, उनले भने । 

संविधान संशोधनमार्फत बाँकी मधेस आन्दोलन र अन्य आन्दोेलनका थाती रहेका मुद्दालाई सम्बोधन गर्न नेपाली कांग्रेस र नेकपा एमाले एक ठाउँ उभिनुपर्ने आवश्यक रहेको लोसपाको भनाइ छ । भूकम्प र कोरोना महामारीले ल्याएको आर्थिक मन्दीबाट देशलाई निकास दिन पनि मुख्य दलबीच सहमतिको आवश्यकता भएकाले यसमा आफ्नो सहमति रहने लोसपाले बताएको छ ।