सोह्रखुट्टेमा सडक भासिएर बन्यो ११ फिट गहिरो खाल्टो

१९ असार, काठमाडौं । काठमाडौंको सोह्रखुट्टेमा मुख्य सडक भाँसिएको छ । सोह्रखुट्टे चोकबाट बालाजुतर्फको सडक भासिएको हो । बुधबार सोह्रखुट्टे–बालाजु सडकखण्डमा करिब ११ फिट गहिरो खाल्डो परेको प्रहरीले जनाएको छ । 

सडक भासिएसँगै यातायात आवागमनमा असर परेको छ । बुधबार बिहान काठमाडौं महानगरपालिका १६ नयाँबजारस्थित कुमारी टोलको गेटअगाडि परेको खाल्डोमा मोटरसाइकल समेत खसेको थियो ।

चालकको तत्कालै सकुशल उद्दार गरिएपनि मोटरसाइकल भने केही घण्टापछि निकालिएको थियो। काठमाडौं महानगरपालिका,नेपाल प्रहरी र शस्त्र प्रहरीको सहायतामा चालक र मोटरसाइकलको उद्दार गरिएको छ । 

भाँसिएको ठाउँबाट पानी र बालुवा निस्किरहेको छ । अहिले सडक विभागले भासिएको स्थानमा बार लगाएर छेउबाट सवारी आवागमन सुचारु गरिरहेको छ ।